މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އިން މިހާރު ގެންގުޅޭ އުޅަނދު، މަހާ ޖައްރާފުއަށް ވުރެ ތިންގުނަ ބޮޑު މުޅިން އައު ހޮޕާ ޑްރެޖަރެއް ސަރުކާރުން ހޯދާފައިވާ ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.
ރޭ ބޭއްވި “ނޭޝަން ޗެޓް” ޕޮޑްކާސްޓުގައި ވާހަކަދައްކަވަމުން ރައީސް ވަނީ މި އަހަރު ނިމުމުގެ ކުރިން އާ ޑްރެޖަރ ރާއްޖެއަށް ގެންނާނެ ކަމަށް ލަފާކުރައްވައިފައެވެ. މަހާ ޖައްރާފަކީ އެމްޓީސީީސީން ކުރިއަށްގެންދާ ބިން ހިއްކުމުގެ މަޝްރޫއުތަކުގައި މައިގަނޑު ގޮތަކަށް ބޭނުންކުރާ އުޅަނދެވެ.
ޑްރެޖަރު އައުމާއެކު ބިން ހިއްކުމުގެ މަޝްރޫއުތައް އަވަސް ދުވެލީގައި ކުރިއަށްދާނެ ކަމަށް އެމަނިކުފާނު ވިދާޅުވިއެވެ. އަދި އަމިއްލަ ފަރާތްތަކުގެ މަސައްކަތްތައް ހިންގުމަށް އެމްޓީސީސީގެ ޤާބިލުކަން ފުޅާކޮށް، ސަރުކާރުގެ މަޝްރޫޢުތަކުން ލިބޭ އާމްދަނީއަށްވުރެ ބޮޑު އާމްދަނީއެއް ހޯދުމަކީވެސް ސަރުކާރުގެ އަމާޒެއް ކަމަށް މައުލޫމާތުދެއްވިއެވެ.
އެމްޓީސީސީގެ ދަށަށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ބަދަލުކުރުމަށް ރާވާފައި އޮތުމުން އެ ކުންފުނި އިތުރަށް ހަރުދަނާވެގެންދާނެ ކަމަށް ސަރުކާރުން ގަބޫލުކުރެއެވެ. ސަރުކާރުން އެ ނިންމުން ތަންފީޒު ކުރުމުން، މަގު ތަރައްގީ ކުރުމުގެ މަޝްރޫއުތަކަށް ގަންނަ ބޮޑެތި އުޅަނދުތަކާއި އެހެނިހެން ސާމާނު އާރުޑީސީގެ ކޮންޓްރޯލުން އެމްޓީސީސީގެ ދަށަށް ބަދަލުވާނެއެވެ. ރޭގެ ޕޮޑްކާސްޓުގައި މި މޭރުމުން ވާހަކަދައްކަވަމުން ރައީސް ވިދާޅުވީ އެމްޓީސީސީން ކުރިއަށްގެންދާ މަޝްރޫއުތަކަށް ބޭނުންވާ ކަންކަމަށް އެކުންފުންޏަށް ޑޮލަރު ހޯދައިދިނުމަށް، ސަރުކާރުން ފަސޭހަކުރާނެ ކަމަށެވެ.
ކިޔުންތެރިންގެ ހިޔާލު