ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ މެނޭޖިންގ ޑިރެކްޓަރ ޑރ. ޢަލީ އަޒްވަރު، ސްރީލަންކާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު، ހިޒް އެކްސެލެންސީ މުޙައްމަދު ރިޒްވީ ހަސަންއާ މިއަދު ބައްދަލުކުރައްވައި، ދެ ޤައުމުގެ ދެމެދުގައި ހަކަތައިގެ ދާއިރާއިން ގުޅުން ބަދަހިކުރުމާ ގުޅޭގޮތުން މަޝްވަރާކުރައްވައިފިއެވެ. މި ބައްދަލުކުރެއްވުމުގައި މައިގަނޑު ގޮތެއްގައި ވާހަކަދެކެވުނީ ދެ ޤައުމުގެ ދެމެދުގައި އޮތް ޒަމާންވީ ގާތް ގުޅުމުގެ މައްޗަށާއި، ހަކަތައިގެ ސިނާޢަތް ކުރިއެރުވުމަށް ދެމެހެއްޓެނިވި ގޮތެއްގައި ގުޅިގެން މަސައްކަތް ކުރެވިދާނެ ދާއިރާތަކާ ގުޅޭގޮތުންނެވެ.
މި ބައްދަލުކުރެއްވުމަކީ ރާއްޖޭގެ ހަކަތައިގެ ސިނާޢަތު އިތުރަށް ތަރައްޤީކޮށް، ދެމެހެއްޓެނިވި ގޮތެއްގައި ކަރަންޓުގެ ޚިދުމަތް ފޯރުކޮށްދިނުމަށް ސްޓެލްކޯއިން ކުރަމުންދާ މަސައްކަތްތަކުގެ ތެރެއިން ކުރިއަށްދިޔަ މުހިންމު މަޝްވަރާއެކެވެ. ޑރ. ޢަލީ އަޒްވަރު ވަނީ ރާއްޖެއާއި ސްރީލަންކާއާ ދެމެދު އޮންނަ ތާރީޚީ ގުޅުމުގެ މުހިންމުކަން ފާހަގަކުރައްވައި، ތަޖުރިބާ ހިއްސާކުރުމާއި ފަންނީ ރޮނގުން އެއްބާރުލުން ދިނުމުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ. އަދި ސްރީލަންކާގެ ސަފީރު ވަނީ ރާއްޖޭގެ ތަރައްޤީއަށް، ޚާއްޞަކޮށް ހަކަތައިގެ ދާއިރާ ކުރިއެރުވުމަށް އެ ޤައުމުން ވެދެވެން އޮތް ކޮންމެ އެހީތެރިކަމެއް ވެދެއްވާނެކަމުގެ ޔަޤީންކަން ދެއްވާފައެވެ.
ސްޓެލްކޯގެ މެނޭޖިންގ ޑިރެކްޓަރ ކަމުގެ މަޤާމަށް މިއަހަރުގެ އެޕްރީލް މަހު އައްޔަންކުރެއްވި ޑރ. ޢަލީ އަޒްވަރަކީ އިއާދަކުރަނިވި ހަކަތައާ ގުޅޭގޮތުން ޕީއެޗްޑީ ހާސިލުކުރައްވާފައިވާ، އަދި އެ ކުންފުނީގައި ގިނަ ދުވަސްތަކެއް ވަންދެން ޚިދުމަތްކުރައްވާފައިވާ ތަޖުރިބާކާރު ބޭފުޅެކެވެ. އެހެންކަމުން، މިފަދަ ބައިނަލްއަޤުވާމީ ބައްދަލުވުންތަކުގެ ސަބަބުން، ކުންފުނީގެ ޚިދުމަތްތައް ޒަމާނީކޮށް، ތިމާވެއްޓާ ރައްޓެހި ހަކަތައިގެ ނިޒާމުތައް ރާއްޖޭގައި ޤާއިމުކުރުމަށް އިތުރު ބާރަކަށް ވެގެންދާނެކަމަށް ބެލެވެއެވެ. ރާއްޖޭގައި މަސައްކަތްކުރާ ސްރީލަންކާގެ ގިނަ އަދަދެއްގެ ރައްޔިތުންނާއި ފަންނީ މާހިރުންގެ ފަރާތުންވެސް ރާއްޖޭގެ ތަރައްޤީއަށް މުހިންމު ޙިއްޞާތަކެއް ވަމުންދާކަން މި ބައްދަލުކުރެއްވުމުގައި ފާހަގަކުރައްވާފައިވެއެވެ.
ކުރިމަގުގައި ސްޓެލްކޯއާއި ސްރީލަންކާގެ ކަމާގުޅޭ މުއައްސަސާތަކާ ގުޅިގެން ޙަރަކާތްތެރިވުމަށް މަގުފަހިވެގެންދިޔަ މި ބައްދަލުވުމަކީ، ރާއްޖޭގެ ހަކަތައިގެ ދާއިރާއަށް ހެޔޮ ބަދަލުތަކެއް ގެނުވާނެ ފެށުމެއްކަމުގައި އެ ކުންފުނިން ދެކެއެވެ. ބޭރުގެ ޤައުމުތަކާއެކު މިފަދަ ގުޅުންތައް ބަދަހިކުރުމަކީ، ރައްޔިތުންނަށް ދެމެހެއްޓެނިވި ގޮތެއްގައި އިތުބާރުހުރި ޚިދުމަތެއް ފޯރުކޮށްދިނުމަށް ސްޓެލްކޯއިން ގެންގުޅޭ ސްޓްރެޓީޖިކް އަމާޒުތައް ޙާޞިލުކުރުމަށް އެޅޭ މުހިންމު ފިޔަވަޅެކެވެ.
ކިޔުންތެރިންގެ ހިޔާލު