މޯލްޑިވްސް އެއާޕޯޓްސް ކޮމްޕެނީ ލިމިޓެޑް، (އެމްއޭސީއެލް) އިން ވެލާނާ އިންޓަނޭޝަނަލް އެއާޕޯޓުގެ ޓާމިނަލް އެކެއްގައި ދަތުރުވެރިންނަށް އަރާމުކުރުމަށާއި ޚިދުމަތްތައް ހޯދުމަށް ޚާއްސަ އާ ޖާގައެއް ހުޅުވައިފިއެވެ.
މި އާ ޖާގަ ހުޅުވުމަކީ އެއާޕޯޓުން ފުރާ ފަސިންޖަރުންނަށް ލިބޭ ޚިދުމަތްތަކުގެ ފެންވަރު މަތިކޮށް، ދަތުރުވެރިންނަށް ލުއިފަސޭހަ އަދި ހިތްގައިމު މާހައުލެއް ފޯރުކޮށްދިނުމަށް އެޅުނު މުހިންމު ފިޔަވަޅެއް ކަމަށް އެމްއޭސީއެލްއިން ބުނެއެވެ.
އަލަށް ހުޅުވި މި ސަރަހައްދާއެކު، ޓާމިނަލްގެ ފުރަތަމަ ބުރީގައި ފަސިންޖަރުންނަށް މަޑުކޮށްލުމަށް ގާތްގަނޑަކަށް 750 އަކަމީޓަރުގެ އިތުރު ޖާގައެއް ވަނީ ތަރައްގީކޮށްފައެވެ. މި ތަނުގައި ދަތުރުވެރިންނަށް ފުރުމުގެ ކުރިން އަރާމުކޮށްލުމަށްޓަކައި ހިތްފަސޭހަ މާހައުލެއް ލިބޭނެހެން ތަފާތު ވައްތަރުގެ ގޮނޑިތައް ވަނީ އަތުރާފައެވެ.
މީގެ އިތުރުން، މި ޖާގައިގައި ކުޑަކުދިންނަށް ޚާއްސަ 136 އަކަމީޓަރުގެ ކުޅޭ ސަރަހައްދެއް ވަނީ ގާއިމުކޮށްފައެވެ. މި ސަރަހައްދުގައި އެކި ލެވެލްތަކުގެ ޕްލޭ ފްލެޓްފޯމްތަކާއި، ރައްކާތެރި ހޮޅިތަކާއި، ވާ އަދި ރިންގު ބޭނުންކޮށްގެން އަރާ ފޭބޭނެ ވަސީލަތްތަކުގެ އިތުރުން ބޯޅަ ކުޅޭ ޖާގައެއް ވެސް ހިމެނެއެވެ. މިއީ ޓާމިނަލް އެކަކުން ދަތުރުކުރާ އާއިލާތަކަށާއި ކުޑަކުދިންނަށް އަމާން އަދި އުފާވެރި ވަގުތުކޮޅެއް ހޭދަކުރެވޭނެ ގޮތަށް ފަރުމާކޮށްފައިވާ ތަނެކެވެ.
މި ޖާގައިގައި ބޭންކް އޮފް މޯލްޑިވްސްގެ ޚާއްސަ ކައުންޓަރެއް ވެސް ގާއިމުކޮށްފައިވެއެވެ. މި ކައުންޓަރު މެދުވެރިކޮށް ބޭރު ފައިސާ މާރުކުރުމުގެ ޚިދުމަތާއި، ދިވެހި ރައްޔިތުންނަށް ޑޮލަރު ދޫކުރުމުގެ ޚިދުމަތް ދަތުރުވެރިންނަށް ލިބޭނެއެވެ.
މި އާ ޖާގަ ހުޅުވުމަކީ ޓާމިނަލް އެކެއްގެ ޚިދުމަތްތައް ތަރައްގީކުރުމަށް އެމްއޭސީއެލްއިން ކުރަމުންދާ މަސައްކަތަށް ލިބުނު ބޮޑު ކުރިއެރުމެކެވެ. ވެލާނާ އިންޓަނޭޝަނަލް އެއާޕޯޓަކީ ޒަމާނީ، އެންމެންނަށް ބޭނުންކުރެވޭނެ، އަދި ފަސިންޖަރުންގެ ބޭނުންތަކަށް އިސްކަންދޭ ތަނަކަށް ހެދުމަށް އެ ކުންފުނިން ދޭ އަހަންމިއްޔަތު މި ފިޔަވަޅުން ރަމްޒުކޮށްދެއެވެ. ވީއައިއޭގެ އައު ޓާމިނަލް ރަސްމީކޮށް ހުޅުވާފައި ވަނީ މިދިޔަ އަހަރުގެ މިނިވަން ދުވަހުއެވެ. މި ޓާމިނަލް ފަރުމާކޮށްފައި ވަނީ އަހަރަކު 7.5 މިލިއަން ފަސިންޖަރުންނަށް ޚިދުމަތް ދެވޭނެ ގޮތަށެވެ.
ކިޔުންތެރިންގެ ހިޔާލު