ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު މިއަދު ވަނީ ދިވެހިންގެ ސަގާފަތާއި ހިސާބު އިލްމުގެ ގުޅުން ދިރާސާކޮށް އެކުލަވާލާފައިވާ ހާއްސަ ފޮތެއް ނެރެދެއްވާފައެވެ.
ދިވެހިރާއްޖޭގެ ގައުމީ ޔުނިވަސިޓީގެ އިދާރީ މަރުކަޒުގައި ބޭއްވި ހާއްސަ ރަސްމިއްޔާތެއްގައި މި ފޮތް ނެރެދެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދެވެ. ގައުމީ ޔުނިވަސިޓީގެ ވައިސް ޗާންސެލަރު ޑޮކްޓަރު އާއިޝަތު ޝެހެނާޒް އާދަމް ލިޔުއްވާފައިވާ މި ފޮތަކީ ތައުލީމީ މަންހަޖާއި ދިވެހިންގެ ސަގާފަތުގެ އިތުރުން ހިސާބުގެ ހަމަތައް ގުޅުވައިލައިގެން ރާއްޖޭގައި ޝާއިއުކުރި މިފަދަ ފުރަތަމަ އިލްމީ މަސައްކަތެވެ.
މި ފޮތުގައި ކަސަބު ވިޔުމާއި، މަސްވެރިކަމާއި، ދަނޑުވެރިކަމުގެ އިތުރުން ކަނޑުދަތުރުފަތުރުކުރުމާއި ވަޑާންކުރުން ފަދަ ދިވެހިންގެ ޒަމާންވީ މަސައްކަތްތަކުގައި ހިސާބު އިލްމު ބޭނުންކޮށްފައިވާ ގޮތްތައް ވަރަށް ތަފްސީލުކޮށް ބަޔާންކޮށްދީފައިވެއެވެ. މީގެ ސަބަބުން ދިވެހިންގެ ކާބަފައިންގެ އާދަކާދަތަކުގެ ތެރޭގައި ހިސާބު އިލްމު ބޭނުންކުރަމުން އައިސްފައިވާ މިންވަރު ވަރަށް ރަނގަޅަށް ހާމަވެގެންދެއެވެ.
މި ފޮތް ވުޖޫދަށް ގެނައުމަށްޓަކައި ޑޮކްޓަރު ޝެހެނާޒް ވަނީ ރާއްޖޭގެ އެކި ރަށްރަށަށް ދަތުރުކުރައްވައި ތާރީހީ އަދި ބަހަވީ އިލްމުވެރިންނާ ބައްދަލުކުރައްވައި ގިނަގުނަ މައުލޫމާތުތަކެއް އެއްކުރައްވާފައެވެ. މީގެ އިތުރުން ބޭރުގެ އެކިއެކި ހަޟާރަތްތަކުގެ ނުފޫޒުން ރާއްޖޭގެ ހިސާބު އިލްމަށް އައިސްފައިވާ ބަދަލުތައްވެސް މި ދިރާސާގެ ތެރެއިން ހޯއްދަވާފައިވާކަމަށް އެކަމަނާ ވިދާޅުވެފައިވެއެވެ.
ދަރިވަރުންނަށް އެނގޭ އާންމު ދިރިއުޅުމާ ގުޅުންހުރި ކަންކަމުގެ ތެރެއިން އުނގަންނައިދިނުމަކީ ކިޔެވުމަށް އޮންނަ ޝައުގުވެރިކަން އިތުރުކޮށްދޭނެ ކަމެއްކަން ފާހަގަކުރައްވަމުން ޑޮކްޓަރު ޝެހެނާޒް ވިދާޅުވީ މިއީ ފޮތެއްގެ ސިފައިގައި ނެރުމަށް ކުރަމުން އައި ވަރަށް ބޮޑު އުއްމީދެއް ކަމަށެވެ. އަދި މި ފޮތުގެ ސަބަބުން ހިސާބު އިލްމަށް ދިވެހިންގެ މެދުގައި އޮންނަ ލޯބި އިތުރުވެ އެ ދާއިރާގެ މައުލޫމާތު އިތުރަށް މުއްސަނދިވެގެން ދިއުމަކީ އެކަމަނާގެ އެންމެ ބޮޑު އެދިވަޑައިގަތުމެވެ.
ކިޔުންތެރިންގެ ހިޔާލު