ލޭ ހަދިޔާކުރާ މީހުންގެ ދުވަސް ފާހަގަކުރުމުގެ ގޮތުން ބޭއްވި ޖަލްސާއެއްގައި ވާހަކަދައްކަވަމުން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤު ޙަލީމް ވިދާޅުވީ، އަލަށް ތައާރަފުކުރެވޭ ޑިޖިޓަލް ދަފުތަރުގެ ސަބަބުން ލޭ ހޯދުމަށް ބޭނުންވާ މީހުންނަށާއި ލޭ ހަދިޔާކުރަން ބޭނުންވާ މީހުންނަށް ވަރަށް ބޮޑަށް ލުއިފަސޭހަވެގެންދާނެ ކަމަށެވެ. އަދި ތެލަސީމިއާ ބަލި ހުންނަ މީހުންނަކީ ގަވާއިދުން ލޭ އަޅަންޖެހޭ ބަޔަކަށްވާތީ، އިތުބާރު ހުރި ނިޒާމެއް ގާއިމުވެފައި އޮތުމަކީ ކޮންމެހެން ބޭނުންތެރި ކަމެއްކަން އޭނާ ފާހަގަކުރެއްވިއެވެ. ތެލަސީމިއާ ބަލިމީހުންނަށް ދޭ ފަރުވާ ފުރިހަމަކުރުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ޚާއްސަ އިސްކަމެއް ދެއްވާކަމަށްވެސް ސީއީއޯ ވިދާޅުވިއެވެ.

މި ސަރުކާރު އައި ފަހުން ތެލަސީމިއާ ބަލި ހުންނަ މީހުންނަށް ލުއިފަސޭހަކަން ހޯދައިދިނުމަށް ގިނަ މަސައްކަތްތަކެއް ކުރެވިފައިވާކަމަށް ސީއީއޯ ވިދާޅުވިއެވެ. މިގޮތުން، ތެލަސީމިއާ ބަލި ތަހައްމަލުކުރަމުންދާ މީހުންގެ ރަޖިސްޓަރީ ވަންގަވް ޕޯޓަލް މެދުވެރިކޮށް ބެލެހެއްޓޭނެ ނިޒާމު މިހާރު ވަނީ ގާއިމުކޮށްފައެވެ. މީގެ އިތުރުން، މިއަހަރުގެ ފެބްރުވަރީ މަހު ޑީއެންއޭ ލެބޯޓަރީގެ ޚިދުމަތް ފަށައި، ހުކުރު ދުވަހުވެސް އެ ތަނުގެ ޚިދުމަތް ލިބޭނެ އިންތިޒާމު ވަނީ ހަމަޖައްސާފައެވެ. ހުކުރު ދުވަހު ލޭ އެޅުމުގެ ޚިދުމަތް ދޭން ފެށުމަކީ ތެލަސީމިއާ ސެންޓަރުން ޚިދުމަތުގައި ހޭދަކުރި 35 އަހަރުގެ ދިގު ތާރީޚުގައި ލިބުނު ބޮޑު ކާމިޔާބީއެއްކަމަށް ސީއީއޯ ސިފަކުރެއްވިއެވެ.

Advertisement

ފާއިތުވި 2025 ވަނަ އަހަރުގެ ޖުލައި މަހު އެންޑޯކްރައިނޮލޮޖީގެ ޚިދުމަތް ފަށާފައިވާއިރު، އެ އަހަރުގެ އޮގަސްޓު މަހުން ފެށިގެން ހިމޭޓޮލޮޖީގެ ޚިދުމަތާއި، އެޗްއެލްއޭ ޓައިޕިންގ އަދި ބޯން މެރޯއާ ގުޅޭ ޓެސްޓުތަކުގެ ޚިދުމަތް ވިޒިޓިންގ ކޮންސަލްޓެންޓުންގެ އެހީތެރިކަމާއެކު ދަނީ ފޯރުކޮށްދެމުންނެވެ. މިއަހަރުގެ މިހާތަނަށް ތެލަސީމިއާ ބަލި ތަހައްމަލުކުރާ ހަތަރު ކުދިން އުފަންވެފައިވާކަން ފާހަގަކުރައްވައި، މިކަމާ މެދު އާންމުން ހޭލުންތެރިކޮށް ކައުންސެލިންގގެ ޚިދުމަތްތައް ހަރުދަނާކުރުމަކީ މާލެ ސިޓީ ގްރޫޕް އޮފް ހޮސްޕިޓަލްސްގެ މައިގަނޑު އެއް އަމާޒުކަމަށް ސީއީއޯ އިބްރާހީމް ޢަބްދުއްރައްޒާޤު ޙަލީމް ވިދާޅުވިއެވެ.