ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ބޮލުގައި އެއްވެސް ހަގީގަތެއް ނެތް ދޮގު އިލްޒާމް އަޅުވައި ‘އަދަދު’ ނޫހުން އުފައްދާފައިވާ ޑޮކިއުމެންޓްރީއާ ގުޅިގެން، އެ ނޫހުގެ ސީއީއޯ ހުސައިން ފިޔާޒު މޫސާ އާއި ‘އަދަދު’ގެ އެޑިޓަރު ހަސަން މުހައްމަދު މާދަމާ ފުލުސް އޮފީހަށް ހާޒިރުވާން ޗިޓު ފޮނުވައިފިއެވެ.
މިދިޔަ މަހު ފަހުކޮޅު އާންމު ކުރި އެ ޑޮކިއުމެންޓްރީގެ މައްސަލައިގައި ފުލުހުން ރޭ ވަނީ ކޯޓު އަމުރެއްގެ ދަށުން އަދަދު ނޫހުގެ އޮފީސް ބަލައިފާސްކޮށް ހެކީގެ ގޮތުގައި ބޭނުން ހިފިދާނެ ކަމަށް ބެލެވޭތަކެތި ގެންގޮސްފައެވެ.
ފުލުހުންގެ ތަހުގީގަށް ހާޒިރުވުމަށް އަންގައި ފިޔާޒާއި ހަސަންއަށް ފޮނުވި ޗިޓުގައި ސަބަބެއް ކަމަށް ބުނެފައި އޮތީ، “ރައީސް މުހައްމަދު މުއިއްޒު ގަޒްފުކޮށްފައިވާ ކަމަށް ތުހުމަތުކޮށް، އައިޝާ ނަމުގައި ވީޑިއޯ ރިޕޯޓެއް ޝާއިއުކޮށްފައިވާ މައްސަލައިގައި ބައިވެރިވުން އޮތް ކަމަށް ތުހުމަތު ކުރެވޭތީ” ކަމަށެވެ.
އިއްޔެ ބޭއްވި ނޫސްވެރިންގެ ބައްދަލުވުމެއްގައި ‘އަދަދު’ ނޫހުން ވަނީ ރައީސް މުއިއްޒުއާ އެ ޑޮކިޔުމެންޓްރީއާ ގުޅުވައި ސުވާލެއްކޮށްފައެވެ. އެ ސުވާލުގެ ޖަވާބުގައި ރައީސް ވިދާޅުވީ އެއީ “ކަނޑައެޅިގެން ދޮގު ކަމަށެވެ” އަދި “ދޮގު ވާހަކަ ދެއްކި ހުރިހާ ފަރާތްތަކާ ދެކޮޅަށް ދައުވާ ކުރަން” ކަމާ ބެހޭ ހުރިހާ ފަރާތްތަކުގެ ކިބައިން އެދިވަޑައިގަންނަވާ ކަމަށް ރައީސް ވިދާޅުވިއެވެ.
ކިޔުންތެރިންގެ ހިޔާލު