ބޯކޮށް ވާރޭވެހި މާލޭގެ މަގުތަކުގައި ފެންބޮޑުވުމާ ގުޅިގެން، ފެން ހިންދުމުގެ މަސައްކަތް އެމްއެންޑީއެފުން މިއަދު ފަށައިފިއެވެ.

މިހާރު ކުރަމުންދާ ވިއްސާރައިގައި މާލޭގެ އެކި ސަރަޙައްދުތަކުގައި ފެންބޮޑުވަމުންދާތީ، އެމްއެންޑީއެފް ފަޔަރ އެންޑް ރެސްކިއު ސަރވިސްގެ ސިފައިން އަންނަނީ މަގުތަކުން ފެން ހިންދުމަށް ހަރަކާތްތެރިވަމުންނެވެ. މާލެއަށް ބޯކޮށް ވާރޭވެހިފައިވާއިރު، މޫސުމާބެހޭ ޤައުމީ އިދާރާ (މެޓް) އިން ވަނީ ކުރިއަށް އޮތް ތިން ދުވަހުވެސް ރާއްޖެއަށް ވިއްސާރަކުރާނެކަމަށް ލަފާކޮށްފައެވެ.

މެޓް އޮފީހުން ވިދާޅުވި ގޮތުގައި، މި ދުވަސްވަރު އެންމެ ބޮޑަށް ވިއްސާރަކުރާނީ މެދުރާއްޖެތެރެއާއި އުތުރުގެ އަތޮޅުތަކަށެވެ. އަދި ދެކުނުގެ އަތޮޅުތަކަށްވެސް ކެރީގެ އަސަރުކުރާނެކަމަށް ވަނީ ލަފާކޮށްފައެވެ. މޫސުން ގޯސްވުމުގެ ސަބަބުން، އުތުރުގެ އަތޮޅުތަކަށް ހުޅަނގާއި ހުޅަނގުއުތުރުން ގަޑިއަކު 3 މޭލާއި 10 މޭލާ ދެމެދުގެ ބާރުމިނުގައި ވައިޖެހޭނެއެވެ. އަދި މެދުރާއްޖެތެރެއާއި ދެކުނަށް ހުޅަނގުދެކުނާއި ހުޅަނގުން ގަޑިއަކު 7 މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެކަމަށާއި، ވިލާގަނޑުގައި ގަޑިއަކު 30 މޭލަށް ވައިގަދަވުން އެކަށީގެންވާކަމަށްވެސް މެޓުން ވަނީ މަޢުލޫމާތު ދެއްވާފައެވެ.