ކ. މާފުށީ ބަނދަރު ތަރައްގީކުރުމުގެ މަޝްރޫއުގެ މަސައްކަތް ބާރުމިނުގައި ކުރިއަށްދާކަމަށާއި، މިހާރު ކުރިއަށްދަނީ ބަނދަރުގެ ރައްކާތެރިކަމާ ގުޅޭ މުހިންމު އުމްރާނީ މަސައްކަތްތަކެއް ކަމަށް އެމްޓީސީސީން ބުނެފިއެވެ.
އެމްޓީސީސީން ބުނި ގޮތުގައި، މިހާރު އެންމެ އިސްކަމެއް ދީގެން ކުރިއަށްދަނީ ބޭރު ތޮށިލުމުގެ މަސައްކަތެވެ. މީގެ ތެރޭގައި ބަނދަރުގެ ވަރުގަދަކަން އިތުރުކުރުމަށްޓަކައި ބޮޑުހިލަ ޖެހުމުގެ މަސައްކަތް ދަނީ ކުރަމުންނެވެ. 22 މެއި 2023 ގައި ފެށި މި މަޝްރޫއުގެ ޖުމްލަ 50 އިންސައްތައަށްވުރެ ބޮޑު ބައެއް މިހާރު ވަނީ ނިމިފައެވެ.
މާފުށީގެ ފަތުރުވެރިކަމާއި އާންމު ދަތުރުފަތުރަށް އަންނަ ކުރިއެރުމާ އެއްވަރަށް ބަނދަރުގެ ޖާގަ ތަނަވަސްކުރުމަށް ހިންގާ މި މަޝްރޫއުގައި ބަނދަރުގެ ފަޅު ފުންކުރުމާއި، ނެރު ފުންކުރުމުގެ ބޮޑު މަސައްކަތެއް ހިމެނެއެވެ.
ބޮޑުހިލައާއި ޖިއޯ-ބޭގް ބޭނުންކޮށްގެން ބޭރު ތޮށިލުމާއި ރިވެޓްމަންޓް ޖެހުމާއި އެތައް ސަތޭކަ މީޓަރެއްގެ އެއްގަމު ތޮށިލައި، އުޅަނދުފަހަރު ކައިރިކުރާނެ ޖާގަ އިތުރުކުރުމުގެ އިތުރުން ބަނދަރުގެ ޚިދުމަތް ފުރިހަމަކުރުމަށްޓަކައި ބައެއް ކަންކަން ކުރުމަށް ވަނީ ހަމަޖެހިފައެވެ.
އޭގެތެރޭގައި މޫރިންގ ރިންގާއި ބޮއި ހަރުކުރުމާއި ޖެޓީ، ބްރިޖް އަދި އެކްސެސް ޕްލެޓްފޯމް ތަރައްގީކުރުމާއި ބަނދަރު ސަރަހައްދުގައި މަގުބައްތި ޖެހުމާއި، ގާ އެތުރުން ހިމެނެއެވެ.
ޖުމްލަ 82 މިލިއަން ރުފިޔާ ހޭދަވާ މި މަޝްރޫއަކީ 600 ދުވަހުގެ ތެރޭގައި ނިންމުމަށް ހަމަޖެހިފައިވާ މަޝްރޫއެކެވެ.
މި މަޝްރޫއު ނިމުމުން، މާފުށީގެ އިގްތިސާދީ ހަރަކާތްތަކަށް ބޮޑު ދިރުމެއް ލިބި، ކަނޑުމަގުން ކުރާ ދަތުރުފަތުރަށް ވަރަށް ބޮޑު ލުއިފަސޭހަކަމެއް ލިބިގެންދާނެ ކަމަށް ބެލެވެއެވެ.
ކިޔުންތެރިންގެ ހިޔާލު