ކ. މާފުށީ ބަނދަރު ތަރައްޤީކުރުމުގެ މަޝްރޫޢުގައި މިހާރު ކުރިއަށްދަނީ ބަނދަރު ވަށައިގެންވާ ސަރަހައްދުގައި ބޮޑު ހިލަ ޖެހުމުގެ މަސައްކަތްކަމަށް އެމްޓީސީސީން ބުނެފިއެވެ.
ސަރުކާރުން އެމްޓީސީސީއާ ޙަވާލުކޮށްފައިވަނީ މާފުށީގައި 374 މީޓަރުގެ ބަނދަރެއް ހެދުމަށެވެ. މީގެތެރޭގައި މިހާރުގެ ބަނދަރާއި ބަނދަރަށް އަލަށް އިތުރުކުރާ ބައި ހިމެނެއެވެ. މާފުށީ ބަނދަރު ތަރައްޤީކުރުމުގެ މަޝްރޫޢު އެމްޓީސީސީއާ ޙަވާލުކުރީ 76.48 މިލިޔަން ރުފިޔާއަށެވެ.
މާފުއްޓަކީ ރާއްޖޭގައި އެންމެ ފުޅާ ދާއިރާއެއްގައި ލޯކަލް ޓޫރިޒަމްގެ ވިޔަފާރިކުރާ ރަށެވެ. ކޮންމެ ދުވަހަކު އެތައް ބަޔަކު ގޮސްއައިސްހަދާ މާފުއްޓަށް ދިމާވެފައިވާ އެންމެ ބޮޑު އެއް ދައްޗަކީ ލަފާ ފުރުމުގެ ދަތިކަމެވެ.
މާފުށީގައި މިހާރު ބޭނުންކުރަމުންދާ ބަނދަރަކީ ޒަމާންވީ ބަނދަރެކެވެ. ޑިންގިތަކާއި، ޑައިވިން ދޯނިތަކާއި، ލޯންޗުތައް އިތުރުވެ، ބަނދަރުގެ ޖާގައިގެ ދަތިކަން ބޮޑު ރަށެކެވެ. މިއާއެކު ސަރުކާރުންވަނީ އެރަށު ބަނދަރު އިތުރަށް ތަރައްޤީކުރުމުގެ މަސައްކަތް ފަށާފައެވެ. އަދި އެ މަސައްކަތް މިހާރު ހަލުވި ދުވެލީގައި ބާރަށް ކުރިއަށްދެއެވެ.
މާފުށީ ރައްޔިތުންގެ އޮތް އެންމެ ބޮޑު އެއް ކަންބޮޑުވުމަކީ ބަނދަރުގެ މަޝްރޫޢު ކުރިއަށްދާއިރު ބޭރު ތޮއްޓަށް ބަދަލު ގެނެސްދިނުމެވެ. މި ކަންބޮޑުވުން އެރަށު ރައްޔިތުންވަނީ އެކި ފަހަރުމަތިން ސަރުކާރާ ހިއްސާކުރައްވާފައެވެ. މިކަމާ ގުޅޭގޮތުން ވަޒީރު ޢަބްދުﷲ މުއްޠަލިބު ވިދާޅުވެފައިވަނީ ރައްޔިތުން އެދިފައިވާގޮތަށް ބަދަލު ގެނެސްގެން ބަނދަރުގެ މަސައްކަތްކުރުމަށް ނިންމާފައިވާކަމަށެވެ.
ކިޔުންތެރިންގެ ހިޔާލު