ވެލާނާ އިންޓަނޭޝަނަލް އެއާޕޯޓުން (ވީއައިއޭ) 6.7 ކިލޯގެ ހަޝީޝް އޮއިލްއާއެކު އިންޑިއާ ދެމީހަކު ހައްޔަރުކޮށްފިއެވެ.

މި މައްސަލާގައި ހައްޔަރުކޮށްފައިވަނީ އުމުރުން 21 އަހަރާއި 19 އަހަރުގެ ދެ ފިރިހެނުންނެވެ.

ކަސްޓަމްސާއި ފުލުހުން ގުޅިގެން މިމަހު 3 ވަނަ ދުވަހު ހިންގި އޮޕަރޭޝަނެއްގައި މި ތަކެތި އަތުލައިގަނެފައިވަނީ، އެ މީހުންގެ ދަބަސްތައް އާންމު އުސޫލުން ސްކްރީން ކުރުމުގެ ތެރޭގައެވެ. ފޮށިތަކުގެ ތެރޭގައި ފޮރުވާފައި ހުރި މި ތަކެތި ލެބޯޓްރީގައި ތަހުލީލު ކުރުމުން، އެއީ ހަޝީޝް އޮއިލްކަން ވަނީ ކަށަވަރުވެފައެވެ.

އަތުލައިގަތް މި ތަކެތީގެ މަގުމަތީ އަގު ގާތްގަނޑަކަށް 5.4 މިލިއަން ރުފިޔާއަށް އަރާނެ ކަމަށް ކަމާބެހޭ އިދާރާތަކުން ލަފާކުރެއެވެ. މިއީ މިއަހަރުގެ ތެރޭގައި އެއާޕޯޓުން އަތުލައިގަތް މަސްތުވާތަކެތީގެ އެންމެ ބޮޑު އެއް ޝިޕްމަންޓެވެ.

މި މައްސަލާގައި ހައްޔަރުކުރި ދެ މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، ތަހުގީގު ކުރިއަށް ގެންދިއުމަށްޓަކައި އެ މީހުން 6 ދުވަހުގެ މުއްދަތަށް ބަންދުގައި ބޭތިއްބުމަށް ކޯޓުން ވަނީ އަމުރުކޮށްފައެވެ.

ކޯޓުގައި ބޭއްވި ބަންދުގެ މަޖިލީހުގައި މި ދެ މީހުންވެސް ވަނީ އެ މީހުންގެ ދިފާއުގައި ގާނޫނީ ވަކީލަކު އައްޔަން ކުރަން ބޭނުންވާކަމަށް ބުނެފައެވެ.

ރާއްޖެއަށް މަސްތުވާތަކެތި އެތެރެކުރާ މިންވަރު އިތުރުވަމުންދާތީ، ވެލާނާ އިންޓަނޭޝަނަލް އެއާޕޯޓުގައި ފާރަވެރިވުމާއި ސްކްރީން ކުރުމުގެ މަސައްކަތްތައް މިހާރު ވަނީ ކުރިއަށްވުރެ ވަރުގަދަކޮށްފައެވެ. މި ހަފުތާގެ ތެރޭގައިވެސް އެއާޕޯޓުން މަސްތުވާތަކެތި އެތެރެކުރަން އުޅުނު ބަޔަކު އަތުލައިގަނެފައިވާއިރު، މަސްތުވާތަކެތީގެ ވިޔަފާރި ހުއްޓުވުމަށް ސަރުކާރުން އަންނަނީ ހާއްސަ މަސައްކަތްތަކެއް ކުރަމުންނެވެ.