އެމެރިކާގެ ރައީސް ޑޮނަލްޑް ޓްރަމްޕް މެލޭޝިޔާއަށް ޒިޔާރަތް ކުރުމާ ދެކޮޅު ހަދައި ވަރުގަދަ މުޒާހަރާތަކެއް ކޮށްފިއެވެ.

އެތައް ސަތޭކަ ބަޔަކު މިއަދުވަނީ ވެރިރަށް ކުއާލަލްޕޫރުގެ އިންޑިޕެންޑެންސް ސްކޮޔަރ އަދި އަމްޕަންގް ޕާކް ސަރަހައްދަށް އެއްވެ ޓްރަމްޕާ ދެކޮޅަށް އަޑު އުފުލާފައެވެ.

ޣައްޒާއާ ދެކޮޅަށް އިސްތިއުމާރީ އިސްރާއީލުން ކުރަމުންދާ ހަނގުރާމައަށް އެމެރިކާގެ ރައީސް ޓްރަމްޕް ފުރިހަމައަށް ތާއީދުކޮށް އެހީތެރިވަމުން ގެންދާތީ، މެލޭޝިއާގެ މަގުތަކަށް ނުކުތް އާންމުންވަނީ ޓްރަމްޕަށް ނުރުހުން ފާޅުކޮށް ރުޅިވެރިކަމުގެ ޝުއޫރުތައް ފާޅުކޮށްފައެވެ.

އެމެރިކާގެ ރައީސް ޑޮނަލްޑް ޓްރަމްޕް މެލޭޝިޔާއަށް ކުރާ ޒިޔާރަތަކީ، ކުއާލަލަމްޕޫރުގައި ބާއްވާ 47 ވަނަ އާސިއާން ސަމިޓްގައި ބައިވެރިވުމަށް ކުރާ ދަތުރެކެވެ.

އަދި މިއީ، ޓްރަމްޕް ދެވަނަ ފަހަރަށް ވެރިކަމަށް އައިފަހުން އޭޝިޔާއަށް ކުރާ ފުރަތަމަ ދަތުރުވެސް މެއެވެ.

ޣައްޒާ ހަނގުރާމައިގެ މައްސަލާގައި މެލޭޝިޔާގެ ރައްޔިތުން ގެންދަނީ ޓްރަމްޕް މެލޭޝިޔާއަށް އައުން ވަރަށް ބޮޑަށް ކުށްވެރި ކުރަމުންނެވެ.

އާންމުން ގޮވަމުން ގެންދަނީ، ޓްރަމްޕަކީ ފަލަސްތީނާއި، ލުބުނާނާއި، ޔަމަނާއި، ކޮންގޯއާއި އަދި ފިލިޕީންސްގައި ހިންގަމުންގެންދާ ހަނގުރާމައިގެ ޖަރީމާތަކާއި، ނަސްލުނައްތާލުމުގެ ޖަރީމާތަކުގެ ކުށްވެރިއެއް ކަމަށެވެ.