އިންޝުއަރެންސްއާއި ބެހޭ ބިލާއި ޤައުމީ ޕޭމަންޓް ސިސްޓަމްގެ ޤާނޫނަށް އިޞްލާޙު ގެނައުމުގެ ބިލު ރައީސް ޑރ. މުޙައްމަދު މުޢިއްޒު ރޭ ތަޞްދީޤުކުރައްވައިފިއެވެ.
މި ދެ ބިލަކީ 18 އޮގަސްޓު 2025 ގައި ބޭއްވުނު ރައްޔިތުންގެ މަޖިލީހުގެ 2025 ވަނަ އަހަރުގެ ދެވަނަ ދައުރުގެ 26 ވަނަ ޖަލްސާއިން ފާސްކުރެއްވި ބިލުތަކެކެވެ.
އިންޝުއަރެންސް ބިލުގެ މައިގަނޑު މަޤްޞަދަކީ ދިވެހިރާއްޖޭގައި ހަރުދަނާ އަދި ރައްކާތެރި ގޮތެއްގައި އިންޝުއަރެންސް ވިޔަފާރި ހިންގުމަށް ބޭނުންވާ ޤާނޫނީ އޮނިގަނޑު ޤާއިމްކުރުމެވެ. މި ބިލުގައި އިންޝުއަރެންސް ކުންފުނިތަކާއި އިންޓަރމީޑިއަރީންނަށް ލައިސަންސް ދިނުމާއި، އެފަރާތްތައް ރެގިއުލޭޓްކޮށް ސުޕަވައިޒްކުރުމާގުޅޭ އުސޫލުތައް ހިމެނެއެވެ.
އިންޝުއަރެންސް ބިލުގައި ވިޔަފާރިކުރުމުގެ ޢާންމު ހަމަތަކާއި، ކުންފުނިތަކުގެ މެނޭޖްމަންޓް އޮންނަންވީ ގޮތުގެ އުސޫލުތަކާއި، ރެކޯޑް ބެލެހެއްޓުމާއި ރިޕޯޓު ހުށަހެޅުމުގެ އުސޫލުތައް ހިމަނާފައިވެއެވެ. މީގެއިތުރުން، މާކެޓް ކޮންޑަކްޓް އަދި ޑިސްޕިއުޓް ރިޒޮލިއުޝަންގެ ހަމަތަކާއި، ފިޔަވަޅު އެޅުމުގެ އުސޫލުތައްވެސް ބަޔާންކޮށްފައިވެއެވެ.
ޤައުމީ ޕޭމަންޓް ސިސްޓަމްގެ ޤާނޫނަށް ގެނެވުނު އިޞްލާޙުގެ މައިގަނޑު މަޤްޞަދަކީ ދިވެހިރާއްޖޭގެ ޕޭމަންޓް އިންފްރާސްޓްރަކްޗަރ ތަރައްޤީކޮށް، މާލީ ނިޒާމު ހަރުދަނާކުރުމަށް މޯލްޑިވްސް މަނިޓަރީ އޮތޯރިޓީއަށް ބޭނުންވާ ޤާނޫނީ ބާރުވެރިކަން ހޯދައިދިނުމެވެ. މި އިޞްލާޙުގެ ދަށުން އެމްއެމްއޭއަށް ވަކި ކުންފުންޏެއް ނުވަތަ ޕާޓްނަރޝިޕެއް އުފެއްދުމުގެ ބާރު ލިބިދެއެވެ.
އިޞްލާޙުގައި ޕޭމަންޓް ސިސްޓަމެއް ހިންގޭނީ އެމްއެމްއޭގެ ލައިސަންސް ނުވަތަ ހުއްދައާއެކު ކަމަށް ބަޔާންކޮށް، ހުއްދަނެތި ޕޭމަންޓް ޚިދުމަތް ސޮލިސިޓްކުރުން މަނާކޮށްފައިވެއެވެ. މި ކަމާ ޚިލާފުވާ ފަރާތްތަކަށް 100,000 ރުފިޔާއިން 10 މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ
ކިޔުންތެރިންގެ ހިޔާލު