ބޭރު ފައިސާއިން އާމްދަނީ ލިބޭ ވިޔަފާރިތަކުން ވަކި އިންސައްތައެއް ރާއްޖޭގެ ބޭންކިން ނިޒާމުގެ ތެރެއިން މާރުކުރުމަށް ލާޒިމްކުރާ އައު ޤަވާއިދު ތަންފީޒުކުރަން ފެށުމާއެކު، ދައުލަތުގެ ރަސްމީ ރިޒާވަށް ފާހަގަކޮށްލެވޭ ކުރިއެރުމެއް ލިބިފައިވާކަން ފާހަގަކުރެވެއެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހާމަކުރި މަޢުލޫމާތުތަކަށް ބަލާއިރު:
• ޖެނުއަރީ މަހުގެ ނިޔަލަށް ރިސޯޓުތަކުން ބޭންކުތަކަށް 50 މިލިއަން ޑޮލަރަށްވުރެ އިތުރަށް މާރުކޮށްފައިވެއެވެ. މިއީ އެމްއެމްއޭއިން ކުރިން ލަފާކުރި އަދަދަށްވުރެ 10 މިލިއަން ޑޮލަރު އިތުރު އަދަދެކެވެ.
• 90% ރިސޯޓުތަކުން ޤަވާއިދާ އެއްގޮތަށް ޢަމަލުކޮށްފައިވާކަން ފާހަގަކުރެވެއެވެ.
• ޖެނުއަރީ މަހުގެ ނިޔަލަށް ރަސްމީ ރިޒާވު 5% އިތުރުވެ، 708.1 މިލިއަން ޑޮލަރަށް އަރާފައިވެއެވެ.
• ޖެނުއަރީ މަހު ދައުލަތަށް ޓެކްސްއާއި ފީގެ ގޮތުގައި ލިބުނު ބޭރު ފައިސާގެ އާމްދަނީ 12% އިތުރުވެފައިވެއެވެ.
މި ޤަވާއިދުގެ ދަށުން ވިޔަފާރިތަކަށް ބޭރު ފައިސާގެ ދަތިކަމެއްނެތި މާރުކުރުމުގެ ފުރުޞަތު ލިބިގެންދާކަން އެމްއެމްއޭއިން ފާހަގަކުރައްވައެވެ. އަދި މި ޤަވާއިދު ރަނގަޅަށް ތަންފީޒުވެއްޖެނަމަ، ބޭންކު ކާޑުތަކުގެ ޑޮލަރު ލިމިޓު އިތުރުކުރުމާއި، ބޭރަށް ފުރާ ދިވެހިންނަށް ދޫކުރާ ޑޮލަރުގެ އަދަދު އިތުރުކުރުމުގެ ފުރުޞަތު އޮތްކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ފާހަގަކުރައްވާފައެވެ.
ކިޔުންތެރިންގެ ހިޔާލު