މާލޭގެ އިމާރާތަކުން ވެއްޓުނު ހައްވާ ޔުމްނު ރަޝީދު ވައްޓާނުލާކަން ރިޔާސީ ކޮމިޝަނުގެ ތަހުގީގުން ހާމަވެއްޖެއެވެ.

ރިޔާސީ ކޮމިޝަނުގެ ތަހުގީގު ރިޕޯޓް މިހާރު ވަނީ އާންމުކޮށްފައެވެ.

އެ ރިޕޯޓްގައިވާގޮތުން ތަހުގީގަށް ލިބިފައިވާ އެންމެހައި ހެކިތަކަށް ބަލާއިރު، މީހަކު ޔުމްނު ވައްޓާލީ ކަމަށް ބަލަންޖެހޭ އެއްވެސް ސަބަބެއް ނެތް ކަމަށެވެ.

އިޝްތިހާރު އިޝްތިހާރު

އެ ހެކިތަކަށް ބަލާއިރު، ބޮޑަށް ބުރަވެވެނީ ޔުމްނު ވެއްޓުނީ ކަމަށް ރިޕޯޓްގައިވެއެވެ. ނަމަވެސް ޔުމްނު އަމިއްލައަށް ފުންމަލީ ކަމަށް ކަނޑައެޅެން ނެތް ކަމަށް އެ ރިޕޯޓްގައި ފާހަގަކޮށްފައިވެއެވެ.

ޔުމްނު ވައްޓާނުލާކަން ކަށަވަރުވާ ސަބަބުތައް

- ރައުދާއި ޔުމްނުއާ ދެމެދު ހަމަނުޖެހުމެއް ނުވަތަ ރުޅިވެރިކަމެއް އެ ރޭ ހިނގާފައިނެތް ކަމަށާއި ޔުމްނު ވެއްޓުނު ގޭގެ ނުވަނަ ފަންގިފިލާއަށް އެރީ ވެސް އެއްވެސް މަޖުބޫރުކަމެއް ނެތި އަމިއްލަ އިހްތިޔާރުގައި ކަން

- ޔުމްނު ވެއްޓުނު ގެއަށް އޭނާ ދިޔައީ އަމިއްލަ އިހްތިޔާރުގައި ކަމުން، އޭނާއަށް އަނިޔާއެއް ދިނުމުގެ މަގުސަދުގައި ރައުދު އެ ގެއަށް އޭނާ ގެންދިޔަކަން ފުޓޭޖުތަކުންނާއި ހެކިންގެ ހެކިބަހުން އެނގެން ނެތް ކަން

- ޔުމްނު ވެއްޓުމުން ރައުދު އޭނާ ހޯދަން މަސައްކަތްކޮށް، އެހެން މީހުންނަށް ގުޅައި ތަންތަން ތަކުރާރުކޮށް ބެލިކަން ވެސް އެނގޭ އޮންނަ ކަން

- ޔުމްނު ފުރާޅުމަތީގައި ޖެހުމާ ގުޅިގެން ނޫން ގޮތަކަށް އެހެން އަނިޔާއެއް ލިބިފައިނުވާ ކަމަށާއި މީހަކު ގަދަކަމުން ވައްޓާލުމަށް މަސައްކަތް ކުރުމުގެ އެއްވެސް ނިޝާނެއް ޔުމްނުގެ ހަށިގަނޑުން ފެންނަން އޮތް ކަން މެޑިކަލް ރިޕޯޓްތަކާއި ހެކިންގެ ހެކިބަހުން އެނގެން ނެތް ކަން

އެރޭ ޔުމްނުއާ އެކު އުޅުނު ރައުދު އަހްމަދު ޒިލާލާ ސުވާލުކުރުމުން އެއްވެސް ކަމެއް ހަނދާނުގައި ނެތް ކަމަށް ބުނެފައިވާ ކަމަށް ރިޕޯޓްގައިވެއެވެ.