ސުޕްރީމް ކޯޓުގެ ފަނޑިޔާރު ޑރ. އަޒްމިރަލްދާ ޒާހިރާއި މަހާޒް އަލީ ޒާހިރު މަގާމުން ވަކިކުރުމުގެ މައްސަލަ ރައްޔިތުންގެ މަޖިލީހުގެ ޖުޑީޝަރީ ކޮމިޓީއަށް ފޮނުވައިފިއެވެ.
އަޒްމިރަލްދާ އާއި މަހާޒް ފަނޑިޔާރުކަމުން ވަކިކުރުމުގެ މައްސަލަ ރައްޔިތުންގެ މަޖިލީހަށް ފޮނުވުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން އިއްޔެ ވަނީ ނިންމައިފައެވެ. ޖޭއެސްސީން ނިންމީ މައްސަލަ ބަލާ ކޮމިޓީން ބެލި ސުލޫކީ މައްސަލައިގެ ރިޕޯޓް ބަލައިގަނެ، އެ ރިޕޯޓުގައި ބަޔާންކުރާ ފިޔަވަޅު ފަނޑިޔާރުންގެ މައްޗަށް އެޅުމަށް ނިންމައިފައެވެ. ފިޔަވަޅެއްގެ ގޮތުގައި އެ ރިޕޯޓުގައި އޮތީ ފަނޑިޔާރުކަމުގެ މަގާމުން އެ ދެ ބޭފުޅުން ވަކިކުރުމެވެ.
އެ މައްސަލައަށް މަޖިލީހުން ގޮތެއް ނިންމެވުމަށް އެދިވަޑައިގެން ޖޭއެސްސީގެ ރައީސް އަދި މަޖިލީހުގެ މާފުށީ ދާއިރާގެ މެންބަރު ހުސައިން ރިޒާ އާދަމް މަޖިލީހުގެ ރައީސް އަބްދުއްރަހީމް އަބުދުﷲ އަށް ފޮނުއްވި ސިޓީ މަޖިލީހުގެ މިއަދުގެ ޖަލްސާގައި އިއްވުމުން، އެ މައްސަލަ އިތުރަށް ދިރާސާކުރުމަށް ޖުޑީޝަރީ ކޮޮމީޓީއަށް ނިންމެވިކަން މަޖިލިސް ރައީސް ވަނީ އިއުލާންކުރައްވައިފައެވެ.
ޖުޑީޝަރީ ކޮމިޓީން ފަނޑިޔާރުން ވަކިކުރުމުގެ މައްސަލަ ދިރާސާކުރުމަށްފަހު، ކޮމިޓީން މަޖިލިސް ތަޅުމަށް ރިޕޯޓު ހުށަހަޅަން ޖެހޭނެއެވެ. އެއަށްފަހު އެ ރިޕޯޓަށް މަޖިލީހުގައި ވޯޓަށް އަހާނެއެވެ.
ޖޭއެސްސީން ބުނެފައިވަނީ، މި ދެ ފަނޑިޔާރުން ވަކިކުރަން ނިންމާފައިވަނީ މިދިޔަ ޑިސެމްބަރު 4 ވަނަ ދުވަހު ކްރިމިނަލް ކޯޓަށް ހާޒިރުކުރެވުނު މައްސަލައަކާ ގުޅިގެން ކްރިމިނަލް ކޯޓުގެ ގާޒީންނަށް ނުފޫޒު ފޯރުވާފައިވާކަން ސާބިތުވެފައިވާތީ ކަމަށެވެ.
މި ދެ ފަނޑިޔާރުންގެ އަމަލަކީ ގާނޫނުއަސާސީގެ 142 ވަނަ މާއްދާއާއި، ދިވެހިރާއްޖޭގެ ފަނޑިޔާރުންގެ ގާނޫނުގެ ބައެއް މާއްދާތަކާއި، ފަނޑިޔާރުންގެ ސުލޫކީ މިންގަނޑާ ހިލާފު އަމަލެއް ކަމަށް ޖޭއެސްސީން ބުނެފައިވެއެވެ.
ކިޔުންތެރިންގެ ހިޔާލު