ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަދި އެމަނިކުފާނުގެ އަނބިކަނބަލުން ސާޖިދާ މުޙައްމަދު، ފިޠުރު ޢީދުގެ މުނާސަބަތުގައި ޢީދު ސަލާމް ކުރެއްވުން މިއަދު ކުރިއަށް ގެންދަވައިފިއެވެ. މި ރަސްމިއްޔާތު ބޭއްވުނީ ރައީސުލްޖުމްހޫރިއްޔާގެ ރަސްމީ ގެ، މުލީއާގޭގައި ހެނދުނު 9:00 އިން 11:00 އަށެވެ.
މި ޚާއްޞަ ރަސްމިއްޔާތުގައި ބައިވެރިވެވަޑައިގަތް ފަރާތްތަކުގެ ތެރޭގައި ވަޒީރުން، ރައްޔިތުންގެ މަޖިލީހުގެ މެންބަރުން، ސިޔާސީ ޕާޓީތަކުގެ އިސްވެރިން، ސްޓޭޓް މިނިސްޓަރުން، ރާއްޖޭގައި ހުންނަވާ ބޭރު ޤައުމުތަކުގެ ސަފީރުން އަދި ދައުލަތުގެ އެކިއެކި މުއައްސަސާތަކާއި ކުންފުނިތަކުގެ އިސްވެރިން ހިމެނެއެވެ. އަދި މީގެ އިތުރުން، ގިނަ އަދަދެއްގެ އާންމު ރައްޔިތުންނާއި ޢާއިލާތަކުންވެސް މި ރަސްމިއްޔާތުގައި ބައިވެރިވެ ވަޑައިގެންނެވިއެވެ.
ރައީސުލްޖުމްހޫރިއްޔާގެ އޮފީހުން ވަނީ މި ރަސްމިއްޔާތުގައި ބައިވެރިވުމަށް ހުރިހާ ދިވެހި ރައްޔިތުންނަށް ހުޅުވާލައި ދަޢުވަތު އަރުވާފައެވެ. ފާއިތުވި އަހަރުވެސް ރައީސުލްޖުމްހޫރިއްޔާގެ ދެކަނބަލުން ވަނީ ފިޠުރު ޢީދު ދުވަހު މިފަދަ ރަސްމިއްޔާތެއް ބާއްވަވާފައެވެ.
މި ރަސްމިއްޔާތަކީ ޤައުމީ އެއްބައިވަންތަކަން އާލާކޮށް، ޢީދުގެ އުފާ އެންމެންނާ ޙިއްޞާކުރުމުގެ މުހިންމު ފުރުޞަތެއް ކަމުގައި ފާހަގަކުރެވެއެވެ.
ކިޔުންތެރިންގެ ހިޔާލު