މާލެ ވޯޓަރ އެންޑް ސުވަރޭޖް ކޮންޕެނީ (އެމްޑަބްލިޔުއެސްސީ) އިން މާލެއާއި ހުޅުމާލެ ގުޅުވާލާ ފެނުގެ ވިއުގަ ޓެސްޓްކުރުމުގެ މަސައްކަތް ފަށައިފިއެވެ. މި ވިއުގައަކީ ދެ ރަށުގެ ދެމެދުގައި މީރުފެން ދައުރުކުރެވޭނެ ގޮތަށް ޤާއިމުކުރެވޭ ނިޒާމެކެވެ.

މި މަޝްރޫޢުގެ ދަށުން، 2018 ވަނަ އަހަރު ހުޅުވުނު ސިނަމާލެ ބްރިޖުގެ އަރިމަތީގައި އަޅާފައިވާ ހޮޅިއެއް މެދުވެރިކޮށް ވަނީ ދެ ރަށް ގުޅުވާލާފައެވެ. އެމްޑަބްލިޔުއެސްސީގެ މެނޭޖިންގ ޑިރެކްޓަރ ޢަބްދުލް މަތީން މުޙައްމަދު ވިދާޅުވި ގޮތުގައި، މިހާރު ވަނީ ހޮޅި ސާފުކޮށް، ދެ ކޮޅުން ގުޅާލާފައެވެ. އަދި ވަގުތީ ގޮތުން ޓެސްޓްކުރުމުގެ މަސައްކަތް ފަށައި، މިހާރު 3،000 ޓަނުގެ ފެން ދައުރުކުރެވެމުންދެއެވެ.

މި މަޝްރޫޢު ފުރިހަމަވުމުން، ދުވާލަކު 20،000 ޓަނުގެ ފެން އެއް ރަށުން އަނެއް ރަށަށް ދައުރުކުރެވޭނެ ކަމަށް އެމްޑަބްލިޔުއެސްސީން ލަފާކުރެއެވެ. މީގެ އިތުރުން، ޕަމްޕް ސްޓޭޝަނެއް ޤާއިމުކުރުމާއި، ކަރަންޓު ވިއުގަ އަޕްގްރޭޑްކުރުން ފަދަ އިތުރު މަސައްކަތްތަކެއް ކުރިއަށްދާނެއެވެ.

އެމްޑަބްލިޔުއެސްސީން އަމާޒުކުރަނީ މި އަހަރުގެ މެދުތެރޭގައި، ޖުލައި ނުވަތަ އޮގަސްޓް މަހު، މި ވިއުގައިގެ ޚިދުމަތް ފެށުމަށެވެ. މި ނިޒާމުގެ މައިގަނޑު މަޤްޞަދަކީ މާލެ ސަރަޙައްދުގައި ފެނުގެ ރައްކާތެރިކަން ކަށަވަރުކުރުމެވެ. މިގޮތުން، އެއްވެސް ރަށެއްގައި ފެން ފޯރުކޮށްދިނުމަށް މައްސަލައެއް ދިމާވެއްޖެނަމަ، އަވަހަށް އަދި ފަސޭހަކަމާއެކު އަނެއް ރަށުން ފެން ފޯރުކޮށްދެވޭނެއެވެ.