ކ. ކުޑަގިރީގެ ފަޅުތެރޭގައި އެއާ މޯލްޑިވްސްގެ ދުވަސްވީ ޑޯނިއާ 228 މަރުކާގެ ދެ މަތިންދާބޯޓު ފައްތައި، “ކުޑަގިރި ދޫނިއާ ރެކް” ގެ ނަމުގައި އައު ޑައިވް ސައިޓެއް މިއަދު ރަސްމީކޮށް ހުޅުވައިލައިފިއެވެ.
މި މަޝްރޫޢު ތަރައްޤީކުރުމުގައި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އަދި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގުޅިގެން މަސައްކަތްކޮށްފައިވެއެވެ.
މި ތާރީޚީ އިވެންޓުގައި މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް، އަލްފާޟިލް ތާރިޤު އިބްރާހީމް އަދި އެޗްޑީސީގެ މެނޭޖިންގ ޑިރެކްޓަރ އަލްފާޟިލް މުޙައްމަދު މައުރޫފް ޖަމީލު ބައިވެރިވެ ވަޑައިގެންނެވިއެވެ.
މި ސައިޓް ބެލެހެއްޓުމުގެ ޒިންމާ އެޗްޑީސީއާ ހަވާލުކުރެވިފައިވެއެވެ. “ކުޑަގިރި ދޫނިއާ ރެކް” މި ނަން ދެވިފައިވަނީ ދިވެހިބަހުގެ “ދޫނި” ލަފްޒާ ގުޅުވައިގެންނެވެ. މިއީ ރާއްޖޭގެ އޭވިއޭޝަން ތާރީޚުގައި މުހިންމު ދައުރެއް އަދާކޮށްފައިވާ ދެ މަތިންދާބޯޓު ފައްތައިގެން ތަރައްޤީކޮށްފައިވާ ސައިޓަކަށްވާތީ، “އުދުހުން” ރަމްޒުކޮށްދޭ ގޮތަށް ނަންދެވިފައިވާކަމަށް އެޗްޑީސީން މަޢުލޫމާތު ދެއެވެ.
މި ދެ މަތިންދާބޯޓާއެކު، މި ސަރަޙައްދަކީ ރާއްޖޭގައި އޮންނަ ހަމައެކަނި އެއާކްރާފްޓް ރެކް ޑައިވް ސެންޓަރެވެ.
ބޯޓުތައް ފައްތާފައިވަނީ ފުރިހަމައަށް ސާފުކުރުމަށްފަހު، އޮޔާއި ރާޅުގެ އަސަރު ކުޑަވާނެހެން ރޭވިގެންނެވެ. އަދި ބޯޓުތައް ރައްކާތެރިކުރުމަށްޓަކައި ކޮންކްރީޓު ބަރުތަކެއް ހަރުކުރެވިފައިވެއެވެ.
މީގެއިތުރުން، މި ސައިޓުގެ ޝައުޤުވެރިކަން އިތުރުކުރުމަށްޓަކައި އެޗްޑީސީން މުރަކަ އިންދުމުގެ މަސައްކަތް ކުރިއަށް ގެންދިއުމަށް ރާވާފައިވެއެވެ.
ކިޔުންތެރިންގެ ހިޔާލު