މިހާރުގެ ވިއްސާރައާ ގުޅިގެން ދިވެހިރާއްޖޭގެ ހުރިހާ ސަރަހައްދެއްގައި ސިފައިން ތިބީ ފުރިހަމަ ތައްޔާރީ ހާލަތުގައި ކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހިމް ހިލްމީ ވިދާޅުވެއްޖެއެވެ.
ޕީއެސްއެމް ނިއުސްއަށް ދެއްވި ޚާއްޞަ ބަޔާނެއްގައި މޭޖަރ ޖެނެރަލް ހިލްމީ ވިދާޅުވީ، ވިއްސާރައާ ގުޅިގެން ދުރާލާ ތައްޔާރުވެ، ފެން ހިންދުމުގެ މަސައްކަތް ވަނީ ފަށާފައި ކަމަށެވެ. މިގޮތުން މިހާތަނަށް 17 ޕަމްޕް ބޭނުންކޮށްގެން ފެން ހިންދުމުގެ މަސައްކަތް ކުރިއަށްދާ ކަމަށާއި، މިހާތަނަށް 5,000 ޓަނުގެ ފެން ވަނީ ބޭރުކުރެވިފައި ކަމަށް އެމަނިކުފާނު ހާމަކުރެއްވިއެވެ.
“އޭގެ އިތުރުން، 58 ގެ ހިމެނޭ ގޮތަށް 458 ވެލިބަސްތާ މިހާރު ވަނީ ޖަހައިދެވިފައި. މާލެއަށް ކުރާ ވިއްސާރައިގެ އަސަރު މި ސަރަހައްދުގެ އެހެން ރަށްތަކަށްވެސް ކުރަމުންދާތީ، އަޅުގަނޑުމެން އެ ރަށްތަކުގައިވެސް ހަރަކާތްތެރިވާން ފަށައިފިން،” މޭޖަރ ޖެނެރަލް ހިލްމީ ވިދާޅުވިއެވެ.
މާލޭގެ އިތުރުން މާލެ އަތޮޅުގެ ތިން ރަށެއްގައި އެމްއެންޑީއެފްއިން ދަނީ ހަރަކާތްތެރިވަމުންނެވެ. އެގޮތުން ކ. ހުރާ، ކ. ހިންމަފުށި އަދި ކ. ގުރައިދޫގައި ހަރަކާތްތެރިވަމުންދާއިރު، ކ. ތުލުސްދޫއަށްވެސް އެހީވުމަށް މިހާރު އެމްއެންޑީއެފްގެ ޓީމުތައް ދަތުރުކުރަމުންދާ ކަމަށް އެމަނިކުފާނު ހާމަކުރެއްވިއެވެ.
މޭޖަރ ޖެނެރަލް ހިލްމީ އިތުރަށް ވިދާޅުވީ، ސިފައިން ތިބީ އަތޮޅުތެރޭގައިވެސް ކަމެއް ދިމާވެއްޖެ ހާލަތެއްގައި އިޖާބަ ދިނުމަށް ފުރިހަމައަށް ތައްޔާރަށް ކަމަށެވެ. މިގޮތުން ހުރިހާ އޭރިއާ ކޮމާންޑްތަކެއް ވަނީ އެކްެކްޓިވޭޓްކުރެވިފައި ކަމަށް އެމަނިކުފާނު ފާހަގަކުރެއްވިއެވެ.
ސިފައިންގެ ބަހާއެއްގެ ގޮތުގައި ހިންގަމުންދާ ކޯސްޓް ގާޑުވެސް ވަނީ ކަނޑުމަތީގެ ހާދިސާތަކަށް ފުރިހަމައަށް ތައްޔާރުވެފައެވެ. މޭޖަރ ޖެނެރަލް ހިލްމީ ވިދާޅުވީ، މިހާތަނަށް ކަނޑުމަތީގެ އެއްވެސް ހާދިސާއެއް ރިޕޯޓުކޮށްފައި ނުވިނަމަވެސް، މޫސުމާބެހޭ އިދާރާއިން ދޭ އިރުޝާދުތަކަށް ސަމާލުވުމަކީ މުހިންމު ކަމެއް ކަމަށެވެ. އަދި ކަނޑު ދަތުރުކުރައްވާ ފަރާތްތަކުން މޫސުމަށް ސަމާލުވުމަށް އެމަނިކުފާނު އިލްތިމާސްކުރެއްވިއެވެ.
ކިޔުންތެރިންގެ ހިޔާލު