ކުޅިވަރު އެސޯސިއޭޝަންތަކުގެ ހަރުދަނާކަން އިތުރުކުރުމުގެ މަސައްކަތުގެ ތެރެއިން، އަހަރީ ރިޕޯޓު ހުށަހެޅުމުގައި ހުރި ގޮންޖެހުންތައް މިހާރު ވަނީ ހައްލުކުރެވިފައިކަމަށް ކޮމިޝަނަރ އޮފް ސްޕޯޓްސް މުޙައްމަދު ޠަލާލް ހާމަކުރައްވައިފިއެވެ.
ޠަލާލް ވިދާޅުވީ އަހަރުގެ މާރިޗު މަހުގެ ނިޔަލަށް އަހަރީ ރިޕޯޓު ހުށަހެޅުމުގެ މަސައްކަތް ފުރިހަމައަށް ނިމިގެންދާނެކަމަށް ވިދާޅުވިއެވެ. މީގެ އިތުރުން، އެސޯސިއޭޝަންތަކުގައި ފާހަގަކުރެވުނު މައިގަނޑު މައްސަލަތަކުގެ ތެރޭގައި މާލީ ހިސާބުތައް ބެލެހެއްޓުމާއި ހިންގާ ގަވާއިދުގެ ފުށުއެރުންތައް ހިމެނޭކަމަށްވެސް ފާހަގަކުރެއްވިއެވެ.
މަދު އަދަދެއްގެ އެސޯސިއޭޝަންތަކެއް ފިޔަވައި، ގިނަ އެސޯސިއޭޝަންތަކުގެ ހިންގާ ގަވާއިދުތައް ވަނީ އިޞްލާޙު ކުރެވިފައެވެ. މިހާރު އެސޯސިއޭޝަންތަކުގެ ހިންގާ ގަވާއިދުތައް ހުންނާނީ ކުޅިވަރު ޤާނޫނާއި، ބައިނަލްއަޤްވާމީ މިންގަނޑުތަކާއި، އަދި ދިވެހިރާއްޖޭގެ ޤާނޫނުތަކާ އެއްގޮތްވާ ގޮތުގެ މަތިންކަން ޔަޤީންކޮށް ދެވިދާނެ – ޠަލާލް
Advertisement
ކުޅިވަރު އެސޯސިއޭޝަންތަކުން ކަނޑައެޅިފައިވާ މުއްދަތެއްގެ ތެރޭގައި އަހަރީ އާންމު ޖަލްސާ ބޭއްވުމަކީ ލާޒިމު ކަމެކެވެ. މި ޖަލްސާގައި އެސޯސިއޭޝަނާ ގުޅުންހުރި މުހިންމު ކަންކަން ފާސްކޮށް ހުށަހަޅަންޖެހެއެވެ. ކުރިން ފާހަގަކުރެވިފައިވާ ގޮތުގައި، ހުށަހަޅަންޖެހޭ ބައެއް މަޢުލޫމާތު މަދުވެފައިވާކަން ފާހަގަކުރެވުނު ނަމަވެސް، މިހާތަނަށް ދެވިފައިވާ އިރުޝާދުތަކާއެކު އެކަން ވަނީ ފާހަގަކުރެވޭ މިންވަރަކަށް ހައްލުކުރެވިފައިކަމަށް ޠަލާލް ވިދާޅުވިއެވެ.
ދިވެހިރާއްޖޭގެ ޤައުމީ ކުޅިވަރު އެސޯސިއޭޝަންތަކުން އާންމު ގޮތެއްގައި އަހަރު ފެށުމާއެކު އަހަރީ ކަލަންޑަރު އެކުލަވާލައި، ބަޖެޓް ފާސްކޮށް އަދި އަހަރީ އާންމު ޖަލްސާ ބާއްވަމުން ގެންދެއެވެ.
ކިޔުންތެރިންގެ ހިޔާލު