ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ އާއި މިނިސްޓްރީ އޮފް ޓޫރިޒަމް އެއްކޮށްލައްވައި، އައު މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓްގެ ވަޒީރުކަމަށް ޠާރިޤު އިބްރާހީމް ޢައްޔަންކުރައްވާފައެވެ. މި ޢައްޔަންކުރެއްވުމަށް ރައްޔިތުންގެ މަޖިލީހުގެ ރުހުން ހޯއްދެވުމަށްޓަކައި ރައީސުލްޖުމްހޫރިއްޔާ ވަނީ މަޖިލީހަށް ހުށަހަޅުއްވާފައެވެ.
ރައްޔިތުންގެ މަޖިލީހުގެ މިއަހަރުގެ ފުރަތަމަ ޖަލްސާގައި މި މައްސަލައާ ގުޅޭ ރައީސުލްޖުމްހޫރިއްޔާގެ ސިޓީފުޅު އިއްވުމަށްފަހު، އެ މައްސަލަ ވަނީ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް ފޮނުވިފައެވެ.
މި ބަދަލު ގެންނެވުމުގެ ސަބަބަކީ ކުރީގެ ޓޫރިޒަމް މިނިސްޓަރު އިބްރާހީމް ފައިޞަލް އެ މަޤާމުން ވަކިކުރެއްވުމާ ގުޅިގެންނެވެ. ފައިޞަލްގެ ޢައްޔަންކުރެއްވުމާ ގުޅިގެން ރައްޔިތުންގެ ފަރާތުން ފާޑުކިޔުންތަކެއް އަމާޒުވެފައިވާކަން ފާހަގަކުރެވެއެވެ. ނަމަވެސް، ފައިޞަލް ވަކިކުރެއްވި ސަބަބު ރަސްމީކޮށް ހާމަކުރައްވާފައެއް ނުވެއެވެ.
މި ބަދަލާއެކު، ޠާރިޤު އިބްރާހީމްގެ ނަންފުޅު މަޖިލީހުގެ ރުހުމަށް ހުށަހެޅިފައިވާއިރު، ކުރިއަށް އޮތް ދުވަސްތަކުގައި މި މައްސަލަ މަޖިލީހުގައި ބަހުސްކުރެވި، ވޯޓަށް އެހޭނެކަމަށް ބެލެވެއެވެ.
ކިޔުންތެރިންގެ ހިޔާލު