ދިވެހިރާއްޖެއިން އިޒްރާއީލްގެ ބޮޑުވަޒީރު ބެންޖަމިން ނަތަންޔާހޫގެ ބަސްތައް ހަރުކަށި އިބާރާތުން ކުށްވެރިކޮށްފިއެވެ. ފަލަސްތީނުގެ ދައުލަތް ސައުދީ އަރަބިއާގައި ޤާއިމްކުރުމަށް ނަތަންޔާހޫ ހުށަހެޅި ހުށަހެޅުމަކީ ޒިންމާދާރުކަން ކުޑަ، އަދި ސައުދީ އަރަބިއާގެ މިނިވަންކަމަށާއި ފަލަސްތީނު ރައްޔިތުންގެ ޙައްޤުތަކަށް އަރައިގަތުމުގެ ޢަމަލެއްކަމުގައި ދިވެހި ސަރުކާރުން ދެކެއެވެ.
ޚާރިޖީ ވުޒާރާއިން ނެރުނު ބަޔާނުގައި ވިދާޅުވެފައިވަނީ، ނަތަންޔާހޫގެ މި ބަސްތަކަކީ އދ. ގެ ޗާޓަރާ ޚިލާފު، އަދި ސައުދީ އަރަބިއާގެ މިނިވަންކަމަށް ނުރައްކާވާފަދަ ވާހަކަތަކެއް ކަމަށެވެ. މިފަދަ އެއްވެސް ކަމެއް ދިވެހިރާއްޖެއިން ބަލައިނުގަންނާނެކަން ވެސް ބަޔާނުގައި ފާހަގަކޮށްފައިވެއެވެ.
ފަލަސްތީނު ރައްޔިތުންގެ ސުލްޙަވެރިކަމަށް ނުރައްކާވާފަދަ ނަތަންޔާހޫގެ ބަސްތަކާ މެދު ފިޔަވަޅު އެޅުމަށް ބައިނަލްއަޤްވާމީ މުޖުތަމަޢުއަށް ދިވެހިރާއްޖެއިން ގޮވާލައިފައިވެއެވެ. އަދި އިރުމަތީ ގުދުސްއަކީ ފަލަސްތީނުގެ ވެރިރަށްކަމުގައި ދިވެހިރާއްޖެއިން ދެކޭކަމާއި، ފަލަސްތީނުގެ މިނިވަންކަމަށާއި އެ ޤައުމުގައި ރައްޔިތުންގެ މިނިވަން ދައުލަތެއް ޤާއިމުކުރުމަށް ދިވެހިރާއްޖެއިން އަބަދުވެސް ތާއީދުކުރާނެކަން ބަޔާނުގައި ފާހަގަކޮށްފައިވެއެވެ.
ކިޔުންތެރިންގެ ހިޔާލު