ރައީސުލްޖުމްހޫރިއްޔާ ޑޮކްޓަރޮކްޓަރ މުޙައްމަދު މުޢިއްޒުގެ ޚާއްޞަ އިރުޝާދުގެ ދަށުން، ދިވެހިރާއްޖޭގައި ޑިޖިޓަލް ޓްރާންސްފޮމޭޝަންގެ އިންޤިލާބީ ބަދަލަކަށް މަގުފަހިކުރުމަށް މުހިންމު ނިންމުންތަކެއް ނިންމައިފިއެވެ. މިއަދު ހެނދުނު ރައީސް އޮފީހުގައި ބޭއްވުނު ވަޒީރުންގެ މަޖިލީހުގެ ބައްދަލުވުމުގައި މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީއިން ހުށަހެޅި ކަރުދާހަކާ ގުޅިގެން މި ނިންމުންތައް ނިންމާފައިވެއެވެ.
މި ނިންމުންތަކުގެ މައިގަނޑު މަޤްޞަދަކީ ދިވެހިރާއްޖޭގެ އުފެއްދުންތެރިކަމުގެ މިންގަނޑުގައި އައި.ސީ.ޓީ ދާއިރާގެ ހިއްސާ އިތުރުކޮށް، ޑިޖިޓަލް އިކޮނޮމީގެ މަންފާ ރައްޔިތުންނަށް ފޯރުކޮށްދިނުމެވެ. މީގެ އިތުރުން، ދިވެހިރާއްޖޭގެ ޑިޖިޓަލް ޓްރާންސްފޮމޭޝަންގެ ދަތުރު އަވަސްކޮށް، އައި.ސީ.ޓީ ދާއިރާއަށް އިންޤިލާބީ ބަދަލެއް ގެނައުމަށް މަގުފަހިކުރުމެވެ.
މި މަޤްޞަދުތައް ހާސިލުކުރުމަށްޓަކައި ގިނަ މަސައްކަތްތަކެއް ކުރުމަށް ވަނީ ނިންމާފައެވެ. އޭގެ ތެރޭގައި ހިމެނެނީ:
1. ޑިޖިޓަލް ޓްރާންސްފޮމޭޝަނާ ގުޅޭ ޒަމާނީ ޤާނޫނުތައް ތަޢާރަފުކޮށް، ޤާނޫނީ އޮނިގަނޑު ފުރިހަމަކުރުން.
2. ސަރުކާރުގެ އިދާރާތަކުގެ މެދުގައި ޑޭޓާ އަދި މަޢުލޫމާތު ޙިއްސާކުރެވޭނެ ޕްލެޓްފޯމެއް ގާއިމުކުރުން.
3. ސިޓިޒަން ސެންޓްރިކް ޚިދުމަތްތައް ފޯރުކޮށްދިނުމަށް ޤައުމީ ފެންވަރުގެ ސެންޓްރަލް ޕްލެޓްފޯމްތައް ތަޢާރަފުކުރުން.
4. ދައުލަތުގެ އިދާރާތަކާއި ސަރުކާރު ހިއްސާވާ ކުންފުނިތަކުން ދޭ ޚިދުމަތްތައް ޑިޖިޓަލައިޒްކުރުން.
5. ނޭޝަނަލް ސޮވަރިންގ ކްލައުޑް ގާއިމުކުރުމާއި، ޑޭޓާ ސެންޓަރުގެ ވަސީލަތްތައް ފުޅާކުރުން.
6. އީ-ފާސް އަދި ޑިޖިޓަލް ސިގްނޭޗަރ ތަޢާރަފުކުރުން.
7. ޑިޖިޓަލް ޓްރާންސްފޮމޭޝަނަށް ބޭނުންވާ މަސައްކަތުގެ އާބާދީއެއް ބިނާކުރުމަށް އެކި ފިޔަވަޅުތައް އެޅުން.
8. އައި.ސީ.ޓީ ޚިދުމަތްތައް ހޯދުމުގައި ދިވެހިންނަށް އިސްކަންދިނުމުގެ ސިޔާސަތެއް ގެންގުޅުން.
9. ޓެކްނޯލޮޖީގެ ސިނާޢަތުގައި އިނޮވޭޝަން ހަބެއް ޤާއިމްކުރުން.
މި ނިންމުންތަކަކީ ދިވެހިރާއްޖޭގެ ޑިޖިޓަލް ޓްރާންސްފޮމޭޝަންގެ ދަތުރުގައި އެޅޭ މުހިންމު ފިޔަވަޅުތަކެކެވެ. މި މަސައްކަތްތައް ކުރިއަށް ގެންދިއުމަށް ވަކި ޓައިމްލައިންތަކެއް ކަނޑައަޅައި، އެކި ކަންކަން ޙާޞިލްކުރާނެ ގޮތްތަކާ ގުޅޭގޮތުން ވަޒީރުންގެ މަޖިލީހުގެ ބައްދަލުވުމުގައި މަޝްވަރާކުރެވިފައިވާކަން ފާހަގަކުރެވެއެވެ.
މި ނިންމުންތަކުގެ ސަބަބުން ދިވެހިރާއްޖޭގެ އައި.ސީ.ޓީ ދާއިރާއަށް ބޮޑު ކުރިއެރުމެއް ލިބި، ޑިޖިޓަލް އިކޮނޮމީގެ މަންފާ ރައްޔިތުންނަށް ލިބޭނެކަމަށް އުންމީދުކުރެވެއެވެ. ޚާއްޞަކޮށް، ސަރުކާރުގެ ޚިދުމަތްތައް ޑިޖިޓަލައިޒްކުރުމުން ރައްޔިތުންނަށް ލުއިފަސޭހަކަމާއެކު ޚިދުމަތް ލިބިގެންދާނެއެވެ.
އަދި މީގެ އިތުރުން، ޑިޖިޓަލް ޓްރާންސްފޮމޭޝަނަށް ބޭނުންވާ މަސައްކަތުގެ އާބާދީއެއް ބިނާކުރުމަށް އަޅާ ފިޔަވަޅުތަކުގެ ސަބަބުން ޒުވާނުންނަށް އައު ވަޒީފާގެ ފުރުޞަތުތައް ހުޅުވިގެންދާނެކަމަށް ބެލެވެއެވެ. އަދި އިނޮވޭޝަން ހަބެއް ޤާއިމްކުރުމުން ޓެކްނޯލޮޖީގެ ދާއިރާގައި އައު އީޖާދުތަކާއި ޙައްލުތައް ހޯދުމަށް މަގުފަހިވެގެންދާނެއެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެފައިވަނީ، “މި ނިންމުންތަކަކީ ދިވެހިރާއްޖޭގެ ޑިޖިޓަލް މުސްތަޤުބަލަށް އަޅާ މުހިންމު ފިޔަވަޅުތަކެއް” ކަމަށެވެ. އަދި “މި މަސައްކަތްތައް ކާމިޔާބުކަމާއެކު ތަންފީޒުކުރެވިއްޖެނަމަ، ދިވެހިރާއްޖެއަށް ވަރަށް ބޮޑު ކުރިއެރުމެއް ލިބިގެންދާނެ” ކަމަށް އެމަނިކުފާނު ވިދާޅުވިއެވެ.
މި މަޝްރޫޢުތައް ކުރިއަށް ގެންދިއުމަށް ކަމާބެހޭ ވުޒާރާތަކުން މިހާރުވެސް ދަނީ ތައްޔާރުވަމުންނެވެ. އަދި ކުރިއަށް އޮތް މަސްތަކުގައި މި މަސައްކަތްތައް ފެށިގެންދާނެކަމަށް ބެލެވެއެވެ. މި މަސައްކަތްތަކުގެ ކުރިއެރުން ގަވާއިދުން ރައްޔިތުންނާ ހިއްސާކުރާނެކަމަށްވެސް ސަރުކާރުން ވަނީ އިޢުލާންކޮށްފައެވެ.
ކިޔުންތެރިންގެ ހިޔާލު