އެކިއެކި ފަރާތްތަކުން ވަގަށް ނަގައިގެން ފުލުހުންނަށް މިހާހިސާބަށް ރިޕޯޓްކޮށްފައިވާ 19.2 މިލިއަން ރުފިޔާގެ ތަކެތި އަނބުރާ ހޯދައި ދީފައިވާކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.
ފުލުހުން މިިކަން ހާމަކުރައްވާފައި ވަނީ މާލެ ސިޓީ ޕޮލިހުގައި ހިމެނޭ މާލެ ފްރަންޓްލައިން ޕޮލިސިން، ތިލަމާލެ ޕޮލިސް އަދި ޓްރެފިކް ޕޮލިސް އެންޑް ރޯޑް މެނޭޖްމަންޓަށް ހުށަހެޅުނު މައްސަލަތަކުގެ ތަފާސްހިސާބުތަކުގައެވެ.
ފުލުހުންގެ ތަފާސްހިސާބަށް ބަލާއިރު، ފާއިތުވި އަހަރު ވަގަށް ނަގާފައިވާ 1653 އެއްޗެއް ހޯދާފައިވެއެވެ. އަދި މިތަކެތީގެ އަގު 19.2 މިލިއަން ރުފިޔާއަށް އަރާކަމަށް ފުލުހުން ހާމަކުރެއެވެ.
ފުލުހުން ވިދާޅުވީ ހޯދި ތަކެތީގެ ތެރޭގައި 206 މޯބައިލް ފޯނު، 253 މޮޓޯ ސައިކަލް، 107 އިލެކްޓްރޯނިކް ސާމާނު އަދި އެހެނިހެން 333 އައިޓަމް ހިމެނޭކަމަށެވެ. މީގެއިތުރުން 374 މައްސަލައެއްގައި ހިމެނޭ 3.5 މިލިއަން ރުފިޔާގެ ނަގުދު ފައިސާވެސް ހޯދިފައިވާކަމަށް ފުލުހުން ވިދާޅުވެއެވެ.
ހިފައިގެންގުޅެ ސާމާނުތަކުގެ ތެރެއިން ވަގަށް ނަގާފައިވާކަމަށް ބެލެވޭ ސާމާނުތައް، ތަންތަނަށް ފުރާނަމަ މިފަދަ ކަންކަމަށް ޚާއްސަ ސަމާލުކަމެއް ދިނުމަށާއި ރައްކާތެރިވުމަށް ފުލުހުން އެދިވަޑައިގެންފައިވެއެވެ.
ކިޔުންތެރިންގެ ހިޔާލު