ޕްރައިވެޓް އިންޝުއަރެންސްގެ ލިމިޓް ހަމަނުވަނީސް އާސަންދަ ދޫނުކުރަން ނިންމި ނިންމުމާ ގުޅިގެން އެލައިޑުން އިއްޔެ ކޭޝްލެސް ޚިދުމަތް މެދުކަނޑާލި ނަމަވެސް، އެ ޚިދުމަތް މިހާރު އަލުން ފަށައިފިއެވެ. މި މަޢުލޫމާތު އެލައިޑުން ވަނީ ސިއްޙީ ޚިދުމަތްދޭ ތަންތަނަށް ރޭ ފޮނުވި އީމެއިލަކުން އަންގާފައެވެ.
މިދިޔަ ބުރާސްފަތި ދުވަހުން ފެށިގެން، ޕްރައިވެޓް އިންޝުއަރެންސްގެ ލިމިޓް ހަމަވުމަށްފަހު އާސަންދަ ދޫކުރުމަށް އާސަންދަ ކުންފުނިން ނިންމި ނިންމުމާ ގުޅިގެން، އެލައިޑް އިންޝުއަރެންސް ހިމެނޭ ގޮތަށް ބައެއް ކުންފުނިތަކުން ވަނީ ކޭޝްލެސްކޮށް ޚިދުމަތް ދިނުން ހުއްޓާލާފައެވެ. މީގެ ސަބަބުން، އަމިއްލަ އިންޝުއަރެންސް އޮތް ނަމަވެސް، ފަރުވާ ހޯދާ ފަރާތްތަކުން ވަނީ ފުރިހަމަ އަގު ދައްކަންޖެހިފައެވެ. އެ ފައިސާ އަނބުރާ ހޯދުމަށް، ފަރުވާ ހޯދި ފަރާތުން އަމިއްލައަށް އިންޝުއަރެންސް ކުންފުންޏަށް ބިލް ހުށަހަޅަންޖެހެއެވެ.
ނަމަވެސް، އެލައިޑުން މިހާރު ވަނީ މި ނިންމުން ބަދަލުކޮށް، އައުޓްޕޭޝަންޓުންގެ ލިމިޓް ހަމަވަންދެން ކޭޝްލެސްކޮށް ޚިދުމަތް ދިނުމަށް ނިންމާފައެވެ. މިކަން އަންގައި، ސިއްޙީ ޚިދުމަތްދޭ ތަންތަނަށް ފޮނުވި މެއިލްގައި ބަޔާންކޮށްފައިވަނީ، އައުޓްޕޭޝަންޓުންގެ ބިލްތައް ސީދާ އެލައިޑަށް ފޮނުވިދާނެ ކަމަށެވެ. އަދި މި ކަމުގައި ދިމާވި ދަތިތަކަށް، ސަރުކާރުގެ އިންޝުއަރެންސް ކުންފުނިން ވަނީ މަޢާފަށް އެދިފައެވެ.
އޭޑީކޭ ހޮސްޕިޓަލުގެ ޗީފް މެޑިކަލް އޮފިސަރު ޑރ. އަބްދުﷲ ނިޔާފު ވިދާޅުވެފައިވަނީ، އާސަންދައިގެ ބަދަލުތަކާ ގުޅިގެން، ޕްރައިވެޓް އިންޝުއަރެންސް ފޯރުކޮށްދޭ ފަރާތްތަކުގެ ޕޯޓަލްތަކުން ބަލިމީހާގެ ބާކީ އޮތް އިންސައްތަ ބަލަންޖެހޭނެ ކަމަށެވެ.
އަދި މި ބަދަލު ގެންނަން ނިންމިކަން އޭޑީކޭއަށް ރަސްމީކޮށް އެންގީ ބުރާސްފަތި ދުވަހުގެ ހަވީރު 4:00 ގެ ފަހުން ކަމަށްވާތީ، މުވައްޒަފުން މިކަމަށް އަހުލުވެރިކުރުމަށް ވަގުތު ނަގާނެ ކަމަށް ވެސް އެމަނިކުފާނު ވިދާޅުވިއެވެ. ނަމަވެސް، އިމަޖެންސީ ފަރުވާ ހޯދުމަށް އަންނަ މީހުންނަށް ކުރިންވެސް އަމަލުކުރަމުން އައި ފަދައިން، ބިލިންގގެ ކުރިން ޚިދުމަތް ފޯރުކޮށްދެވޭނެއެވެ.
ކިޔުންތެރިންގެ ހިޔާލު