ރާއްޖެއިން ޕާކިސްތާނަށް ކަނޑައަޅާފައި ހުންނަވާ ސަފީރު މުހައްމަދު ތޯހާ، މިދިޔަ ހުކުރު ދުވަހު އަފްޣާނިސްތާނުގެ މަންދޫބު ސަރުދާރު އަހުމަދު ޝަކީބުއާ އިސްލާމްއާބާދުގައި ބައްދަލުކުރެއްވުމާ ގުޅިގެން، ފޮރިން މިނިސްޓްރީން މިއަދު ވަނީ އެއީ ދިވެހި ސަރުކާރުގެ ހުއްދަނެތި ކުރެއްވި ބައްދަލުވުމެއް ކަމަށް ބުނެ، އެކަމާ ގުޅިގެން ފިޔަވަޅު އަޅާފައިވާ ކަމަށް ހާމަކޮށްފައެވެ.
މި ބައްދަލުވުމާ ގުޅިގެން ތާލިބާން ޖަމާއަތުން އަފްޣާނިސްތާނުގައި ހިންގާ ވެރިކަން ރާއްޖެއިން ބަލައިގަތްތޯ ސުވާލު އުފެދުމާ ގުޅިގެން، ފޮރިން މިނިސްޓްރީން ވަނީ ގައުމުތަކުގެ ސަރުކާރުތައް ބަލައިގަތުމުގައި އދ. އިން ކަނޑައަޅާފައިވާ މިންގަނޑުތަކާއި އުސޫލުތަކަށް ބަލާ ކަމަށާއި، އެގޮތުން އދ. ގައި އަފްޣާނިސްތާނު ތަމްސީލުކުރާ ފަރާތަކީ ދިވެހި ސަރުކާރުން ވެސް ބަލައިގަންނަ ފަރާތްކަމަށް ބަޔާންކޮށްފައެވެ.
އަފްޣާނިސްތާނުގެ އެމްބަސީން ބުނާ ގޮތުގައި މި ބައްދަލުވުމުގައި މަޝްވަރާކުރެވިފައިވަނީ މުސްލިމް ދެ ގައުމުގެ ގުޅުމާއި، އޭޝިއާގެ ގައުމުތަކާއެކު ރާއްޖެއާ އޮތް ވިޔަފާރީގެ ގުޅުން އަފްޣާނިސްތާނު މެދުވެރިކޮށް ހަރުދަނާކުރުމާ ބެހޭ ގޮތުންނެވެ. އަދި އަފްޣާނިސްތާނުން ބޭނުންވަނީ ހުރިހާ ގައުމަކާ އެކުވެސް ބިނާކުރަނިވި ގުޅުމެއް ބާއްވައި، އެ ގައުމަކީ ސަރަހައްދު ގުޅުވައިދޭ ހަބަކަށް ހެދުމަށް ކަމަށްވެސް ބުނެފައިވެއެވެ.
އޮގަސްޓް 2021 ގައި އެމެރިކާ އާއި އިނގިރޭސި ސިފައިން 20 އަހަރަށްފަހު އަފްޣާނިސްތާނުން ފޭބުމާއެކު، ތާލިބާނުންގެ ހަނގުރާމަވެރިން ވަނީ އެ ގައުމުގެ ސަރުކާރު ވައްޓާލައި ވެރިކަމަށް އަރާފައެވެ. ތިން އަހަރު ފާއިތުވެގެން ދިޔައިރުވެސް ދުނިޔޭގެ ގިނަ ގައުމުތަކުންނާއި ބައިނަލްއަގުވާމީ ޖަމާއަތްތަކުން އަދިވެސް ތާލިބާނުންގެ ސަރުކާރު ބަލައެއް ނުގަނެއެވެ.
ނ. ހޮޅުދޫ އުފަންވެލި، ތޯހާ މުހައްމަދު އަކީ ކުރިން ސައޫދީ އަރަބިއްޔާގެ ސަފީރަކަށް ހަމަޖައްސަން ރައްޔިތުންގެ މަޖިލީހުން ރުހުން ދީފައިވާ ބޭފުޅެކެވެ. ނަމަވެސް ސަބަބު ބަޔާންނުކޮށް، ދިވެހި ސަރުކާރުން ވަނީ އޭނާ ޕާކިސްތާނުގެ ސަފީރަކަށް ބަދަލުކުރައްވާފައެވެ.
ކިޔުންތެރިންގެ ހިޔާލު