އެޑިއުކޭޝަން މިނިސްޓްރީން އާންމުކުރި 2025 ވަނަ އަހަރުގެ އެކެޑެމިކް ކަލަންޑަރުގައިވާ ގޮތުން ދަރިވަރުންނަށް ޑިސެމްބަރު މަހުގެ ތެރޭގައި ބޮޑުޗުއްޓީ ލިބޭގޮތަށް ވަނީ ހަމަޖައްސާފައެވެ. މި ބަދަލަކީ 2021 ވަނަ އަހަރު ރައީސް އިބްރާހީމް މުޙައްމަދު ޞާލިޙްގެ ވެރިކަމުގައި، ބޮޑު ޗުއްޓީ އަހަރުގެ މެދުތެރެއަށް ބަދަލުކުރި ބަދަލަށް ގެނެވުނު އިތުރު ބަދަލެކެވެ.
ރައީސް މުޢިއްޒު ރިޔާސީ އިންތިޚާބުގެ ވަޢުދެއްގެ ގޮތުގައި ބޮޑު ޗުއްޓީ އަލުން ޑިސެމްބަރަށް ބަދަލުކުރުމަށް ވިދާޅުވެފައިވާއިރު، މި އަހަރުގެ ޖެނުއަރީ މަހުގެ ހަތްވަނަ ދުވަހު ބޭއްވި ކެބިނެޓް ބައްދަލުވުމުގައި 2025 އިން ފެށިގެން މި ބަދަލު ގެނައުމަށް ވަނީ ނިންމާފައެވެ. މިގޮތުން 2025 ވަނަ އަހަރުގެ ދިރާސީ އަހަރު ފެށޭނީ އޭޕްރީލް ހަވަނަ ދުވަހު ކަމަށާއި، ފުރަތަމަ ޓާމް ނިމޭނީ ޖުލައި 24 ގައި ކަމަށް ވެއެވެ. ދެވަނަ ޓާމްގެ ކިޔެވުން އޮގަސްޓް 10 ގައި ފެށި، ޑިސެމްބަރު 25 ގައި ނިމޭނެއެވެ.
2026 ވަނަ އަހަރުގެ ފުރަތަމަ ޓާމް ފެށުމަށް ހަމަޖެހިފައިވަނީ ޖެނުއަރީ 27 ގައި ކަމަށްވުމާއެކު، 32 ދުވަހުގެ ބޮޑު ޗުއްޓީއެއް ދަރިވަރުންނަށް ލިބޭނެއެވެ. ކުރިން ބޮޑު ޗުއްޓީ އަހަރުގެ މެދުތެރެއަށް ބަދަލުކުރި އެއް ސަބަބަކީ، ފަތުރުވެރިކަމުގެ ދާއިރާގައި މަސައްކަތްކުރާ ބެލެނިވެރިންނަށް ދަރިންނާއެކު ގިނަ ވަގުތު ހޭދަކުރެވޭނެ ގޮތް ހެދުމަށް ކަމަށްވީ ނަމަވެސް، އެހެން ދާއިރާތަކުގައި މަސައްކަތްކުރާ ގިނަ ބެލެނިވެރިން އެދެމުން އައީ އަހަރުގެ ފަހުކޮޅަށް ބޮޑު ޗުއްޓީ ބަދަލުކުރުމަށެވެ.
ކިޔުންތެރިންގެ ހިޔާލު