ނިމިދިޔަ ބައިނަލްއަގުވާމީ ބްރޭކްގައި ޕޯޗުގަލްގެ ގައުމީ ޓީމު ދޫކޮށް ދިޔަ މައްސަލައިގައި، އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯ 30 ދުވަހަށް ސަސްޕެންޑްކޮށް، ފައިސާއިން ޖޫރިމަނާކުރުމަށް ޕޯޗުގަލްގެ ފުޓްބޯޅަ ފެޑެރޭޝަނުން ނިންމައިފިއެވެ.

ޔޫއެފާ ނޭޝަންސް ލީގުގައި ޑެންމާކާ ދެކޮޅަށް ކުޅުނު މެޗުގައި ބޭނުން ނުކުރުމުން، ކޯޗު ހޯޖޭ ހެސޫސްއާ މައްސަލަޖެހި ރޮނާލްޑޯ ވަނީ ޓީމު ދޫކޮށް ގޮސްފައެވެ. މި މައްސަލަ ބެލުމަށްފަހު، ޕޯޗުގަލްގެ ފުޓްބޯޅަ އިދާރާގެ ޑިސިޕްލިނަރީ ކޮމިޓީން ނިންމީ އޭނާ 30 ދުވަހަށް ސަސްޕެންޑްކޮށް، 255 ޔޫރޯ (285 އެމެރިކާ ޑޮލަރު) އިން ޖޫރިމަނާ ކުރުމަށެވެ.

ފެޑެރޭޝަނުން ހާމަކުރި ގޮތުގައި، ރޮނާލްޑޯ އަށް ކުރި ޖޫރިމަނާއަކީ ގަވާއިދުން ކަނޑައެޅިފައިވާ އެންމެ ބޮޑު އަދަދެވެ. ނަމަވެސް، އޭނާ ކުށަށް އިއުތިރާފުވުމާއި، މީގެ ކުރިން އަޚުލާގީ މައްސަލައެއް ފެންމަތިވެފައި ނުވާތީ، ދެވުނު އަދަބު ވަނީ ލުއިކޮށްދީފައެވެ. މިދިޔަ މަހުގެ 30 އިން ފެށިގެން ހިނގަމުންދާ މި ސަސްޕެންޝަންގެ މުއްދަތު ހަމަވާނީ މި މަހުގެ ނިޔަލަށެވެ.

އިޝްތިހާރު އިޝްތިހާރު

ރޮނާލްޑޯ ތުހުމަތުކުރި ގޮތުގައި، މެޗުގެ ފަހު 30 މިނެޓަށް އޭނާ ކުޅެން އަރުވާނެ ކަމަށް ބުނެ ކޯޗު ހެސޫސް ވަނީ ވައުދާ ޚިލާފުވެފައެވެ. އެހެންނަމަވެސް، އެކަމާ ހިތްހަމަނުޖެހި ގައުމީ ޓީމު ދޫކޮށްލުމަކީ ހެދުނު ގޯހެއް ކަމަށް އޭނާ އަމިއްލައަށް ގަބޫލުކޮށް، މައާފަށް އެދިފައިވެއެވެ.

އަންނަ މަހުގެ އިންޓަނޭޝަނަލް ބްރޭކްގައި ރޮނާލްޑޯއަށް އަލުން ޓީމާ ގުޅުމުގެ ފުރުސަތު އޮތް ނަމަވެސް، އެކަން ބިނާވެފައިވަނީ ކޯޗުގެ ނިންމުމުގެ މައްޗަށެވެ. ޕޯޗުގަލްގެ އެފްއޭގެ ރައީސް ޕެޑްރޯ ޕްރޮއެންސާ ވިދާޅުވީ، ރޮނާލްޑޯއަކީ އަދިވެސް ޓީމުގެ ކެޕްޓަން ކަމަށާއި، އޭނާއަކީ ޓީމަށް އެންމެ މުހިންމު ކުޅުންތެރިޔާ ކަމަށެވެ. މީގެ ކުރިން ސައުދީގެ އަލް ނަސްރުގައި ވެސް ރޮނާލްޑޯއަށް އިރުޝާދުދިން ހެސޫސްއާއި ރޮނާލްޑޯއާ ދެމެދު އުފެދުނު މި މައްސަލަ ވަރަށް އަވަހަށް ހައްލުވާނެ ކަމަށް ފެޑެރޭޝަނުން އުއްމީދު ކުރެއެވެ.