މީގެކުރިން ފަތުރުވެރިކަމަށް ދޫކޮށްފައި އޮތް ހދ. ނާގޯށި ރިސޯޓެއްގެ ގޮތުގައި ތަރައްގީކޮށް، އަހަރެއްހާ ދުވަހުގެ ތެރޭގައި ހުޅުވޭނެ ކަމަށް ބެލެވޭ ކަމަށް ޓޫރިޒަމް މިނިސްޓަރު މުހައްމަދު އަމީން ވިދާޅުވެއްޖެއެވެ.
ރިސޯޓު ހެދުމަށް ނާގޯށި އެންމެ ފުރަތަމަ އެމްޓީޑީސީއާ ހަވާލުކުރީ 2006 ވަނަ އަހަރު ކަމަށްވީ ނަމަވެސް، 19 އަހަރުވީއިރު ވެސް އެ ރަށް ރިސޯޓެއްގެ ގޮތުގައި ތަރައްގީ ކުރެވިފައެއް ނުވެއެވެ. މިދިޔަ އަހަރު އޮގަސްޓު މަހު ހދ. އަތޮޅަށް ރައީސް ޑރ. މުހައްމަދު މުއިއްޒު ކުރެއްވި ދަތުރުފުޅެއްގައި ނާގޯއްޓަށް ވަޑައިގެން، މި އަހަރުގެ ތެރޭގައި އެ ރަށް ރިސޯޓެއްގެ ގޮތުގައި ހުޅުވަން މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން، އެމްޓީޑީސީއާ ވަނީ ހަވާލުކޮށްފައެވެ.
އަހާ ފޯރަމުގައި މީހަކު ކުރެއްވި ސުވާލަކަށް ޖަވާބުދެއްވަމުން މިނިސްޓަރު އަމީން ވިދާޅުވީ ނާގޯށީގެ 50 އިންސައްތަ މަސައްކަތް މިހާރު ނިމިފައިވާ ކަމަށެވެ. މަސައްކަތް ކުރަމުން ދިޔައީ މި އަހަރުގެ ނޮވެމްބަރު މަހަށް ހުޅުވަން ކަމަށްވީ ނަމަވެސް، މިހާރު ލަފާކުރެވެނީ އަންނަ 11 ވަރަކަށް މަސް ދުވަހުގެ ތެރޭގައި އެ ތަން އޮޕަރޭޝަނަށް ގެނެވޭނެ ކަމަށެވެ.
ނާގޯށި ތަރައްގީކުރަން އެކި ފަހަރު މަތިން އެމްޓީޑީސީއާ ހަވާލުކޮށްފައިވާއިރު، އެ ކުންފުންޏަށް ބޭރުގެ ކުންފުނިތަކާ ހަވާލުކޮށްގެން އެ މަސައްކަތް މީގެކުރިން ކާމިޔާބުކަމާއެކު ކުރިއަށް ގެންގޮސްދެވިފައެއް ނުވެއެވެ. އެގޮތުން، ރަޝިއާގެ ތުރީކެއާ އިންޓަނޭޝަނަލް ކުންފުންޏަށާއި ދުބާއީގެ ކޮންޓްރެކްޓަކަށް އެ ރަށް މީގެކުރިން ދީފައިވެއެވެ.
ގާތްގަނޑަކަށް 30 މިލިއަން ޑޮލަރު ނުވަތަ 462.6 މިލިއަން ރުފިޔާ އިންވެސްޓްކޮށްފައިވާ ނާގޯށީގެ މަސައްކަތް ނިނިމި ލަސްވުމާ ގުޅިގެން، އެމްޓީޑީސީއާއެކު ސަރުކާރުން ސޮއިކޮށްފައިވާ އެއްބަސްވުން ކުރިން ބާތިލު ވެސް ކޮށްފައިވެއެވެ. ނަމަވެސް، ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުގައި 2017 ވަނަ އަހަރުގެ އޮގަސްޓު މަހު ވަނީ އަލުން އެ ރަށް 50 އަހަރަށް އެ ކުންފުންޏާ ހަވާލުކޮށްފައެވެ.
މިދިޔަ އަހަރު އެ ތަން ތަރައްގީ ކުރަން އަލުން އެމްޓީޑީސީއާ ހަވާލުކުރީ ބީޗް ވިލާއާއި، ޖަކޫޒީ ބީޗް ވިލާއާއި، ވޯޓާ ވިލާ ހިމެނޭ ގޮތަށް ހަތަރު ކެޓެގަރީއެއްގެ ކޮޓަރި ހިމެނޭ ގޮތަށެވެ. އެމްޓީޑީސީން މީގެކުރިން ބުނެފައިވާ ގޮތުގައި އެ ރިސޯޓު ހުޅުވުމުން ރަށުގައި 600 ވަޒީފާ އުފެދިގެންދާނެއެވެ.
ކިޔުންތެރިންގެ ހިޔާލު