ހއ. ދިއްދޫ ވޮލީބޯޅަ ކޯޓު ހުޅުވުމުގެ ރަސްމިއްޔާތު ރޭ ދިއްދޫގައި ބާއްވައިފިއެވެ.
މި ރަސްމިއްޔާތު ޝަރަފުވެރިކޮށްދެއްވައި ހުޅުއްވައިދެއްވީ މިނިސްޓަރ އޮފް ޔޫތް އެމްޕަވަމަންޓް، ސްޕޯޓްސް، އެންޑް ފިޓްނަސް ޢަބްދުﷲ ރާފިޢުއެވެ. މި ރަސްމިއްޔާތުގައި ރައްޔިތުންގެ މަޖިލީހުގެ ދިއްދޫ ދާއިރާގެ މެންބަރު ޢަބްދުލް ލަތީފު މުޙައްމަދާއި، އެމްޓީސީސީގެ ޑެޕިއުޓީ މެނޭޖިން ޑިރެކްޓަރ، އަޙުމަދު މުބީން އާއި ދިއްދޫ ކައުންސިލް މެންބަރުން އަދި ސަރުކާރު އިދާރާތަކުގެ އިސް ބައެއް ވެރިން ބައިވެރިވެވަޑައިގެންނެވިއެވެ.
މި ވޮލީ ކޯޓު ހެދުމުގެ މަސައްކަތުގެ ދަށުން، ބިންގަނޑު އެއްވަރު ކުރުމާއި، ކޮންކްރީޓް މަސައްކަތްތަކާއި، ދަގަނޑުގެ މަސައްކަތްތަކާއި އިކުއިޕްމެންޓް ހަރުކުރުމުގެ މަސައްކަތްތަކާއި، ޓާރފް އެޅުމާއި ކަރަންޓުގެ މަސައްކަތްތައް ވަނީ ކޮށްފައެވެ. މިއީ 1.24 މިލިއަން ރުފިޔާގެ މަޝްރޫޢެކެވެ.
އާބާދީގައި 4186 މީހުން ދިރިއުޅޭ ދިއްދޫގައި ވޮލީބޯޅަ ކޯޓެއް ތަރައްގީކުރުމުގެ މަޝްރޫއަކީ ރަށުގެ ރައްޔިތުންގެ އުންމީދުތަކާ ވަރަށް ބޮޑަށް ގުޅިފައިވާ މަޝްރޫއެކެވެ. މި ވޮލީކޯޓުގެ މަސައްކަތް ނިމި ރަސްމީކޮށް ހުޅުވުގެންދިއުމާ އެކު، ދިއްދޫ ޒުވާނުންނަށް ވޮލީގައި އިތުރު ކުރިއެރުން ހޯދުމަށް ފުރުސަތު ހުޅުވި، ރަށަށް އިޖުތިމާއީ ގޮތުން ކުރިއެރުންތަކެއް ލިބޭނެ ކަމަށް އެމްޓީސީސީން ދެކެއެވެ.
ވޭތުވެދިޔަ 45 އަހަރުތެރޭ އެމްޓީސީސީން ވާނީ ރާއްޖޭގެ އެކި ކަންކޮޅުތަކުގައި ޢުމްރާނީ ތަރައްޤީގެ ގިނަ މަޝްރޫޢުތަކެއް ހިންގައި ކާމިޔާބުކަމާއެކު ނިންމާފައެވެ. އެމްޓީސީސީ އުފެދުނީ 1980 ވަނަ އަހަރު ކަމަށްވެފައި، ކުންފުނި އުފެދުނީއްސުރެ ރާއްޖޭގެ ޢުމްރާނީ ތަރައްޤީ އާއި އިޖުތިމާޢީ ވަޞީލަތްތައް ބިނާކުރުމުގައި އެ ކުންފުނިން ވާނީ މުހިންމު ދައުރެއް އަދާކޮށްފައެވެ.
ކިޔުންތެރިންގެ ހިޔާލު