ހޮރްމޫޒު ކަނޑުއޮޅިން އަނެއްކާވެސް ތެޔޮ ޓޭންކަރަކަށް ހަމަލާ ދީފިއެވެ.
ޔޫކޭ މެރިޓައިމް ޓްރޭޑް އޮޕަރޭޝަންސް ސެންޓަރުން ބުނެފައިވަނީ، ޓޭންކަރަށް ހަމަލާ އަމާޒުވީ ހޮރްމޫޒު ކަނޑުއޮޅިން އުމާނާ ގާތުން ނުކުންނަން ދަނިކޮށް ކަމަށެވެ.
މި ހަމަލާގެ ސަބަބުން ތެޔޮ ޓޭންކަރަށް ބޮޑެތި ގެއްލުންތައް ލިބުނު ކަމަށާއި، ނަމަވެސް ޓެންކަރުގެ އެއްވެސް ކްރޫއަކަށް ކަމެއް ނުވާ ކަމަށް ބުނެފައި ވެއެވެ. އަދި ކަނޑަށް ތެޔޮ އެޅުމުގެ ކަމެއްވެސް ހިނގާފައި ނުވާކަމަށް ބުނެފައި ވެއެވެ.
ނަމަވެސް، ޓެންކަރުގައި ރޯވެ އަލިފާނާއި ބޯދުން އަރަމުންދާ މަންޒަރު ފެންނަ ވީޑިއޯތައް ސޯޝަލް މީޑިއާގައި ދައުރުވަމުން އެބަ ދެއެވެ.
ތެޔޮ ޓޭންކަރަށް ހަމަލާދިނީ އީރާނުގެ އިންގިލާބީ ލަޝްކަރުގެ ކަނޑުގެ ސިފައިންނެވެ.
ހަމަލާގެ ފަހުން އައިއާރްޖީސީން ބުނެފައިވަނީ، އީރާނުން ހޮރްމޫޒް ބަންދުކޮށްފައި އޮތް އޮތުމާ ޚިލާފްވެ ދަތުރުކުރަން މަސައްކަތް ކުރާ އުޅަނދުފަހަރު ހުއްޓުވާނޭ ކަމަށެވެ.
އީރާނު އަސްކަރިއްޔާގެ އިސް ކޮމާންޑަރެއް ކަމަށްވާ އަދި ޑެޕިއުޓީ އާރމީ ކޯޑިނޭޓަރ ހަބީބުﷲ ސައްޔާރީ ވިދާޅުވީ، އީރާނުގެ އެންގުންތަކާ ޚިލާފްވާ އުޅަނދުފަހަރަށް ހަމަލާ ދޭން ޖެހިއްޖެނަމަ ހަމަލާވެސް ދޭނޭ ކަމަށެވެ.
އޭނާ ވިދާޅުވީ، ދުޝްމަނުންގެ އުޅަނދުތަކަށް މިހާތަނަށްވެސް އެތައް ގެއްލުންތަކެއް ދީފައިވާނޭ ކަމަށާއި، އީރާނާ ދެކޮޅަށް ކަމެއް ހިންގައިފިނަމަ އަނެއްކާވެސް ހަމަލާ ދޭނޭ ކަމަށެވެ.
އީރާނުގެ އެންގުންތަކާ ޚިލާފްވާ އުޅަނދުތަކާއި، ދުޝްމަނުންގެ އުޅަނދުތަކަށް ހަމަލާދޭން ބޭނުންވާ ވަސީލަތްތަކާއި ގާބިލްކަން އީރާނުގައި އެބަހުރި ކަމަށްވެސް، އީރާނު ޑެޕިއުޓީ އާރމީ ކޯޑިނޭޓަރ ހަބީބުﷲ ސައްޔާރީ ވިދާޅުވިއެވެ.
ކިޔުންތެރިންގެ ހިޔާލު