އިޓާލިއަން ސެރީ އޭގައި ބެލްޖިއަމްގެ ކެޕްޓަން ކެވިން ޑި ބްރޭނާ ކާމިޔާބުކުރި ދެ ލަނޑާއެކު، 3-0 ގެ ނަތީޖާއަކުން ފްރޮސިނޯނޭ ބަލިކޮށް ނަޕޯލީން މުހިންމު މޮޅެއް ހޯދައިފިއެވެ.

މި މެޗުގައި ނަޕޯލީގެ ފަރާތުން ފެނިގެންދިޔަ ތިން ލަނޑުގެ ތެރެއިން ފުރަތަމަ ލަނޑާއި ފަހު ލަނޑު ޖަހައިދިނީ މި ސީޒަންގައި މެންޗެސްޓަރ ސިޓީ ދޫކޮށް އެ ޓީމާ ގުޅުނު ތަޖުރިބާކާރު މިޑްފީލްޑަރު ކެވިން ޑި ބްރޭނާއެވެ. އޭނާ މެޗުގެ ފުރަތަމަ ލަނޑު، މެޗުގެ 29 ވަނަ މިނިޓުގައި ކާމިޔާބުކުރީ ޕެނަލްޓީއަކުންނެވެ.

މި ޕެނަލްޓީއަކީ އެންމެ ފުރަތަމަ ރަސްމުސް ހޮއިލުންޑް ފޮނުވާލުމުން ކީޕަރު މަތަކުރި ނަމަވެސް، ޕެނަލްޓީ ޖެހުމުގެ ކުރިން ކީޕަރު ގޯލް ލައިނަށްވުރެ ކުރިއަށް ޖެހިފައި ހުރުމުން ރެފްރީ އަލުން ޖަހަން ދިން ފުރުޞަތެކެވެ. ދެވަނަ ފަހަރަށް ލިބުނު ފުރުޞަތުގައި ޑި ބްރޭނާ ވަނީ ފަސޭހަކަމާއެކު ބޯޅަ ގޯލުގެ ތެރެއަށް ވައްދާލާފައެވެ. އަދި އޭގެ ތިން މިނިޓު ފަހުން، ނޯއާ ލަންގް ވަނީ ނަޕޯލީގެ ދެވަނަ ލަނޑު ޖަހައި ލީޑު ފުޅާކޮށްދީފައެވެ. ޑި ބްރޭނާ އޭނާގެ ދެވަނަ ގޯލު ކާމިޔާބުކުރީ މެޗުގެ އިތުރު ވަގުތުގެ ތެރޭގައެވެ.

އިޝްތިހާރު އިޝްތިހާރު

މި މެޗުން ލިބުނު ތިން ޕޮއިންޓުގެ އިތުރުން ނަޕޯލީއަށް ލިބުނު އެންމެ ބޮޑު ހިތްހަމަޖެހުމަކީ ހިތުގެ މައްސަލައަކާ ގުޅިގެން ކުޅުމާ ދުރުގައި ހުރުމަށްފަހު، ސްކޮޓް މެކްޓޮމިނޭ އަލުން އެނބުރި ދަނޑަށް އައުމެވެ. އޭނާ ކުޅެން ނުކުތީ މެޗުގެ ދެވަނަ ހާފުގައި، 61 ވަނަ މިނިޓުގައެވެ.

މި މެޗުގެ ކުރިން ކުޅުނު ފަސް މެޗުގެ ތެރެއިން ދެ މެޗުން ބަލިވެ، އެއް މެޗުން އެއްވަރުވެފައިވާ ނަޕޯލީއަށް މިއީ އަލުން ރަނގަޅު ފޯމަކަށް އެޅުމަށް ލިބުނު ވަރަށް މުހިންމު ކާމިޔާބީއެކެވެ. މި މޮޅާއެކު ނަޕޯލީ މިހާރު އޮތީ 10 ޕޮއިންޓާއެކު ތާވަލުގެ 6 ވަނައިގައެވެ.

ލީގު ތާވަލުގެ އެއްވަނައިގައި މިވަގުތު އޮތީ 3-0 އިން ޕާމާ ބަލިކުރި އިންޓަރ މިލާނެވެ. އެ މެޗުގައި އިންޓަރ މިލާނަށް ލަނޑުތައް ޖަހައިދިނީ ސުކިޗް، ހަކަން ޗަލްހަންގްލޫ އަދި މާކަސް ތުރާމް އެވެ. އިންޓަރ މިލާން އެއްވަނައިގައި އޮތީ ކުޅުނު 6 މެޗުން 16 ޕޮއިންޓް ހޯދައިގެންނެވެ.