އީ-ކޮމާސްގެ ވިޔަފާރިތަކާއެކު މެއިލްގެ ޚިދުމަތްތަކަށް އަންނަމުންދާ ބަދަލުތަކާ ގުޅިގެން، ބޮޑެތި ޕާރުސަލްތަކަށް ޚާއްޞަކޮށްގެން މޯލްޑިވްސް ޕޯސްޓް ބިލްޑިންގގެ ގްރައުންޑް ފްލޯގައި ޤާއިމުކޮށްފައިވާ “ޕިކްޕޯސްޓް” ސްޓޭޝަން އަލުން ހުޅުވައިފިއެވެ.
މި ސްޓޭޝަން ރަސްމީކޮށް ހުޅުއްވައިދެއްވީ ކޮމިއުނިކޭޝަންސް އޮތޯރިޓީ އޮފް މޯލްޑިވްސްގެ ޗީފް އެގްޒެކެޓިވް އަލްފާޟިލް އިލްޔާސް އަޙްމަދުއެވެ.
މޯލްޑިވްސް ޕޯސްޓުން މަޢުލޫމާތު ދެއްވި ގޮތުގައި، މި ބަދަލަކީ އެ ކުންފުނީގެ އޮޕަރޭޝަނަލް އިންފްރާސްޓްރަކްޗަރ ހަރުދަނާކޮށް ތަރައްޤީކުރުމަށާއި، ވަކިން ޚާއްޞަކޮށް ޑެލިވަރީގެ ނިޒާމު ޒަމާނީ ފެންވަރަކަށް ފުޅާކުރުމަށް ކުރެވެމުންދާ މަސައްކަތްތަކުގެ ދަށުން އެޅުނު މުހިންމު ފިޔަވަޅެކެވެ. މިގޮތުން އަލުން މި ހުޅުވުނު ޕިކްޕޯސްޓް ސްޓޭޝަނަކީ އީ-ކޮމާސް މެދުވެރިކޮށް ރާއްޖެއަށް އެތެރެކުރާ ބޮޑެތި ޕާރުސަލްތައް ދޫކުރުމަށް ޚާއްޞަކޮށްގެން ފަރުމާކޮށްފައިވާ ތަނެކެވެ.
މި ގެނެވުނު ބަދަލާއެކު، މޯލްޑިވްސް ޕޯސްޓުގެ ޑެލިވަރީ ނިޒާމު އިތުރަށް ހަރުދަނާވެ، ބޮޑެތި ޕާރުސަލްތައް ނެގުމުގައި ކަސްޓަމަރުންނަށް ބޮޑެތި ފަސޭހަތަކެއް ލިބިގެންދާނެއެވެ. އަދި މިއީ ޚިދުމަތް ހޯދާ ފަރާތްތަކަށް ލިބޭ ތަޖުރިބާގެ ފެންވަރު އެތައް ގުނައަކަށް ރަނގަޅުވެގެންދާނެ ކަމެއް ކަމުގައިވެސް އެ ކުންފުނިން ފާހަގަކުރެއެވެ.
ޕޯސްޓުގެ އޮޕަރޭޝަނަލް އިންފްރާސްޓްރަކްޗަރ އަދި ޑެލިވަރީ ނިޒާމު ޒަމާނީކުރުމަށް ކުރެވޭ މިފަދަ މަސައްކަތްތަކުގެ ސަބަބުން، ޤައުމުގެ އިސް ވިޔަފާރި ފަހިކޮށްދޭ ފަރާތެއްގެ (ލީޑިންގ ޓްރޭޑް ފެސިލިޓޭޓަރ) ގޮތުގައި މޯލްޑިވްސް ޕޯސްޓުން އަދާކުރާ ދައުރު އިތުރަށް ފުޅާވެގެންދާނެއެވެ. އަދި ކޮންމެ ޚިދުމަތެއްވެސް ރައްޔިތުންނާ ވީހާވެސް ގާތުން، ލުއިފަސޭހަކަމާއެކު ފޯރުކޮށްދިނުމަށް ކުރެވޭ މަސައްކަތްތަކަށް އިތުރު ކުރިއެރުމެއް ލިބިގެންދާނެއެވެ.
ކިޔުންތެރިންގެ ހިޔާލު