އޮންލައިން ވިޔަފާރީގެ މަންސައެއް ކަމަށްވާ “ގްލޯބަލް ދުކާން” އިން ވިޔަފާރިކުރާ ދިވެހި ކަސްޓަމަރުންނަށް، މޯލްޑިވްސް ޕޯސްޓް މެދުވެރިކޮށް ފަސޭހަކަމާއެކު ފައިސާ ދެއްކޭނެ އިންތިޒާމު އެ ކުންފުނިން ތައާރަފުކޮށްފިއެވެ.
މޯލްޑިވްސް ޕޯސްޓުން މައުލޫމާތު ދިން ގޮތުގައި، އައު ހިދުމަތުގެ ދަށުން، ޗެކްއައުޓް ކުރާ ވަގުތު “ޕޭ ތުރޫ މޯލްޑިވްސް ޕޯސްޓް” އިހްތިޔާރުކުރުމަށްފަހު، އެޕްލިކޭޝަނުން ދައްކާ އިރުޝާދުތަކާ އެއްގޮތަށް ފައިސާގެ މުއާމަލާތް ފުރިހަމަކުރެވޭނެއެވެ. އަދި ޝަރުތުހަމަވާ ކަސްޓަމަރުންނަށް ދިވެހި ރުފިޔާއިން ފައިސާ ދެއްކުމަށްޓަކައި، ގްލޯބަލް ދުކާން އެޕްލިކޭޝަން މެދުވެރިކޮށް ހާއްސަ ޕޭމަންޓް ލިންކެއް ލިބިގެންދާނެ ކަމަށް ޕޯސްޓް އިން ބުނެފައިވެއެވެ.
މިއީ ބައިނަލްއަގުވާމީ ކާޑުތަކާއި ބޭރު ފައިސާ ބޭނުންކުރުމުގެ ބަދަލުގައި، ދިވެހި ރުފިޔާއިން ލުއިފަސޭހަކަމާއެކު އަގު އަދާކުރުމަށް ހުޅުވިގެންދިޔަ މުހިންމު ފުރުސަތެކެވެ. މީގެ ސަބަބުން ރާއްޖޭގެ ކަސްޓަމަރުންނަށް ފައިސާ ދެއްކުމުގެ މަރުހަލާ ކުރިއަށްވުރެ ބޮޑަށް ލުއިފަސޭހަވެ، ހިދުމަތް ހޯދުމުގައި ބޮޑެތި ލުއިތަކެއް ލިބިގެންދާނެކަމަށް ޕޯސްޓުން ބުނެއެެވެ.
މޯލްޑިވްސް ޕޯސްޓުން އިތުރަށް ބުނީ، ކުރިއެކޭވެސް އެއްފަދައިން މޯލްޑިވްސް ޕޯސްޓާއި އިންޑިއާ ޕޯސްޓް ގުޅިގެން، ގްލޯބަލް ދުކާން މެދުވެރިކޮށް ގަންނަ މުދާ ރާއްޖޭގެ ކޮންމެ ރަށަކަށްވެސް ޑެލިވަރީ ކޮށްދިނުމުގެ ހިދުމަތް ދެމުންގެންދާނެ ކަމަށެވެ. އަދި މި ޕްލެޓްފޯމުން ވިޔަފާރިކުރުމަށް އިންޑިއާގެ އެޑްރެހެއް ބޭނުމެއް ނުވާނެކަމަށްވެސް އެ ކުންފުނިން ބުންޏެވެ.
ގްލޯބަލް ދުކާން މެދުވެރިކޮށް އިންޑިއާގެ މަޝްހޫރު އީ-ކޮމާސް ޕްލެޓްފޯމްތައް ކަމަށްވާ އެމެޒޯން، މިންތުރާ، ފްލިޕްކާޓް، ނައިކާ، ނައިކާ ފެޝަން އަދި އައިކިއާ ފަދަ ތަންތަނުން ވިޔަފާރިކުރެވޭނެއެވެ. މީގެ ތެރޭގައި ފެޝަން އަދި ލައިފްސްޓައިލް ސާމާނާއި، އިލެކްޓްރޯނިކްސް ސާމާނާއި، ގޭތެރެއާއި ބަދިގެއަށް ބޭނުންވާ ތަކެތީގެ އިތުރުން، ބިއުޓީ އަދި ވެލްނެސް އުފެއްދުންތައް ހިމެނެއެވެ.
ދިވެހިންގެ މެދުގައި ބޮޑު މަގުބޫލުކަމަކާއި އިތުބާރެއް ހޯދާފައިވާ ގްލޯބަލް ދުކާނުން ފައިސާ ދެއްކުމަށް މި ގެނެވުނު ލުޔަކީ، ދިވެހިންނަށް އޮންލައިން ވިޔަފާރީގެ ދާއިރާއިންނާއި ދުނިޔޭގެ ބާޒާރަށް ވާސިލުވުމަށް ލިބިގެންދިޔަ އިތުރު ކުރިއެރުމެއް ކަމަށް މޯލްޑިވްސް ޕޯސްޓުން ފާހަގަކުރެއެވެ.
ކިޔުންތެރިންގެ ހިޔާލު