ޒަކާތުގެ ނިޒާމު ތަރައްޤީ ކުރެއްވުމުގެ ނަތީޖާއެއްގެ ގޮތުން މިދިޔަ އަހަރާއި މި އަހަރަކީ ރެކޯޑް މިންވަރަކަށް ޒަކާތް ލިބުނު ދެ އަހަރަށް ވެއްޖެ އެވެ.
މުދަލު ޒަކާތުގެ ގޮތުގައި އެންމެ ގިނަ އަދަދަކަށް ފައިސާ ލިބުނީ މި އަހަރު އެވެ. އަހަރު ނިމެން ތިން މަސް ދުވަސް އޮއްވާ މިދިޔަ އަހަރަށް ވުރެ އިތުރަށް ވަނީ ފައިސާ ލިބިފަ އެވެ. މިދިޔަ އަހަރަކީ މިހާތަނަށް ޒަކާތުގެ ގޮތުގައި އެންމެ ގިނަ އަދަދަކަށް ފައިސާ ލިބުނު އަހަރެވެ.
މި އަހަރުގެ ސެޕްޓެންބަރު މަހުގެ ނިޔަލަށް 109.26 މިލިއަން ދިވެހި ރުފިޔާ ވަނީ ޒަކާތުގެ ގޮތުގައި ލިބިފަ އެވެ. މިއީ 2025ވަނަ އަހަރު އެއްކޮށް ލިބުނު 106,456,071.00 (ސަތޭކަ ހަ މިލިއަން ހަތަރު ލައްކަ ފަންސާސް ހަ މިލިއަން ހަތްދިހަ އެއް ރުފިޔާ) އަށްވުރެ 2,805,954.69 (ދެ މިލިއަން އަށް ލައްކަ ފަސް ހާސް ނުވަ ސަތޭކަ ފަންސާސް ހަތަރު ރުފިޔާ ފަސްދޮޅަށް ނުވަ ލާރި) އިތުރު އަދަދެކެވެ.
އެކަން ފާހަގަކޮށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސަޢީދު ވިދާޅުވީ ދިވެހިރާއްޖޭގެ ޒަކާތުގެ ނިޒާމަކީ ހަރުދަނާ އުޞޫލުތަކެއްގެ މައްޗަށް އާރާސްތުކުރެވިފައިވާ ނިޒާމެއް ކަމަށާ މިއީ ޤާނޫނަކުން ރައްކާތެރިކަން ލިބިފައިވާ ނިޒާމެއް ކަމަށެވެ.
ޒަކާތު ފައިސާ ބަލަހައްޓަމުންދަނީ މަރުކަޒީ ބޭންކުންކަން ފާހަގަކޮށް ޒަކާތުން ލިބޭ ފައިސާ ހޭދަކުރަމުން ދަނީ އިސްލާމީ ޝަރީޢަތުގައިވާ ގޮތުގެ މަތިން ޝަރީޢާ ގައިޑްލައިނެއް ޢާމުކޮށް އޭގައިވާ ގޮތުގެ މަތިން ކަމުގައި މިނިސްޓަރު ވިދާޅުވި އެވެ.
“.. އަދި ޚަރަދުކުރެވެމުންދާ ގޮތް މަހުން މަހަށް ޢާއްމުކޮށް ހާމަކުރަމުންދޭ. ޒަކާތު ކައުންސިލާއި ޝަރީޢާ ކޮމިޓީގެ ލަފާ ހޯދާ. މި ދިޔަ ދެ އަހަރަކީ ރާއްޖޭގެ ޒަކާތުގެ ނިޒާމަށް ވަރަށް ހެޔޮ ބަދަލުތަކެއް ގެނެވުނު ދެ އަހަރު. ތާރީޚީ ގޮތުން އެންމެ ގިނައިން ޒަކާތް ލިބުނު ދެ އަހަރު. އަދި މި އަހަރަކީ ދިވެހިރާއްޖޭގެ މުޅި ތާރީޚުގައި އެންމެ ގިނައިން ޒަކާތް ދެއްކި އަހަރު” ޝަހީމް ވިދާޅުވި އެވެ.
މީގެ އިތުރުން ފަޤީރުންގެ ދަފުތަރުގައި ޖެހިފައިވާ ފަރާތްތަކަށް އެންމެ ގިނައިން ހޭދަކުރެވުނީ މި ދެ އަހަރު ކަމުގައިވެސް ވިދާޅުވި އެވެ. ފަޤީރުންނަށް މާލީ އެހީތެރިކަން ދިނުމުގެ އިތުރުން ފަޤީރުންގެ ތައުލީމާއި ޞިއްޙަތަށް ވެސް އެންމެ ގިނައިން ހޭދަކުރެވުނު އަހަރަކީ މިދިޔަ ދެ އަހަރު ކަމުގައި ވިދާޅުވި އެވެ.
މީގެ އިތުރުން މިއީ ޝަރީޢާ ހުއްދަކުރާ މަގުން ޒަކާތު ފަންޑު އިތުރުކުރަން ގިނަ މަސައްކަތްތަކެއް ފެށުނު ދެ އަހަރު ކަމަށާ ޒަކާތަށް ވަކި އިދަަރާއެއް ޤާއިމުކުރެވި މަސައްކަތް ކުރަމުންދާތާ ދެ އަހަރު ވަމުންދާކަން ވެސް ފާހަގަ ކުރެއްވި އެވެ.
“ދިވެހި ރައްޔިތުން ރާއްޖޭގެ ޒަކާތުގެ ނިޒާމަށް ދެއްވަމުން ގެންދަވާ އިތުބާރަށްޓަކައި ޝުކުރު ދަންނަވަން. ޤާނޫނަކުން ޒަކާތުގެ ނިޒާމު ތަރައްޤީކޮށްދެއްވި ކަމަށްޓަކައި ރައީސް ޑރ މުޙައްމަދު މުޢިއްޒަށް ޝުކުރު ދަންނަވަން” މިނިސްޓަރު ޝަހީމްގެ ޕޯސްޓްގައިވެ އެވެ.
ކިޔުންތެރިންގެ ހިޔާލު