ނުނިމި ހުރި މައްސަލަތަކުގެ ތެރެއިިން މިއަހަރުގެ ނިޔަލަށް 6000 އަށްވުރެ ގިނަ މައްސަލަ ނިންމުމަށް މަސައްކަތް ކުރަމުންދާކަމަށްއަލްއުސްތާޛު ޢަބްދުލްޤަނީ މުޙައްމަދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، އޭޝިއާގެ ޤައުމުތަކުގެ ކޯޓުތަކާގުޅޭ އިންސްޓިޓިއުޝަންގެ 7ވަނަ ކޮންގްރެސްގައި ދެއްވި ތަޤުރީރުގައެވެ.
މި ކޮންގްރެސްގައި އެސޯސިއޭޝަން އޮފް އޭޝިއަން ކޮންސްޓިޓިއުޝަނަލް ކޯޓްސް އެންޑް އިކުއިވަލަންޓް އިންސްޓިޓިއުޝަންސްގެ މެމްބަރު 18 ޤައުމަކުން އެޤައުމުގެ އެންމެ މަތީ ކޯޓުތަކުގެ އިސްވެރިން ބައިވެރިވެ ވަޑައިންނެވިއެވެ.
ކޮންގްރެސްގައި ދެއްވި ތަޤުރީރުގައި އުއްތަމަ ފަނޑިޔާރު ވިދާޅުވީ، މި ދާއިރާއިން އެންމެ ބޮޑު އިސްކަމެއްދީގެން މިވަގުތު މަސައްކަތް ކުރަމުންދަނީ، އަރޓިފިޝަލް އިންޓެލިޖެންސްގެ ޒަމާނީ ވަސީލަތްތަކާއި އުކުޅުތަކުގެ އެހީގައި، ކޯޓުގެ މައްސަލަތައް ނިންމުމުގެ ނިޒާމަކަށް ރާއްޖެއިން ކުރާ މަސައްކަތް ކަމަށެވެ. ނަމަވެސް، މިއިން އެއްވެސް ކަމެއްގައި ހުރިހާ ކަމެއް އޭއައިއަށް ދޫނުކުރާނެ ކަމަށާއި، ގޮތް ނިންމުމުގެ އެންމެހާ މަސައްކަތްތަކާއި ބަލަންޖެހޭ ބެލުންތައް ބަލާނީ އިންސާނީ އެހީގައި ކަމަށެވެ.
އުއްތަމަ ފަނޑިޔާރުވަނީ ރާއްޖޭގައި މިހާރު ބަލަމުންދާ މައްސަލަތަކާ ގުޅޭ ބައެއް ތަފާސްހިސާބުތައް ޙިއްސާކުރައްވާ، ޚާއްސަކޮށް ނުނިމި ހުރި މައްސަލަތައް އަވަސްކުރުމަށް ހުރި ޢަމާޒުތަކުގެ މަޢުލޫމާތު ޙިއްސާކުރައްވާފައެވެ.
އެގޮތުން ރާއްޖޭގައި ކޯޓުގައި އެކި މަރުހަލާތަކުގައި ބެކްލޮގް ނުވަތަ ނުނިމި ހުރި މައްސަލަތަކުގެ ގޮތުގައި 13،032 މައްސަލަ ބަލަމުންދާ ކަމަށެވެ. އޭގެތެރެއިން 585 ކޭސްއަކީ ނުނިމި، 5 އަހަރަށްވުރެ ގިނަވެފައިވާ މައްސަލަތައް ކަމަށް ވިދާޅުވިއެވެ.
މިއީ، ހުށައަޅާ މައްސަލަތަކުގެ ނިސްބަތުން ކުޑަ ޢަދަދެއް ނަމަވެސް، މީގެ ސަބަބުން ރާއްޖޭގެ އާބާދީގެ %3އަށް އަސަރުކުރާ ކަމަށެވެ.
ކޯތުތަކުގައި މައްސަލަ ބެލުމުގެ ނިޒާމު ހަރުދަނާ ކުރުމަށް ކުރަމުންދާ މަސައްކަތުގެ ދަށުން މިއަހަރުގެ ނިޔަލަށް މީގެތެރެއިން 6185 މައްސަލަ ނިންމުމަކީ، ޢަމާޒުކަމަށް އުއްތަމަ ފަނޑިޔާރު ވިދާޅުވިއެވެ. އަދި ބެކްލޮގުގައި ހުރި އެންމެހާ މައްސަލަތައް، އަންނަ އަހަރުގެ ނިޔަލަށް ބަލާ ނިންމުމަށް ވަނީ ޢަމާޒު ކަނޑައަޅާފައެވެ. މި މަސައްކަތްތައް ކުރިއަށްދާއިރު، އަލަށް ހުށައެޅޭ މައްސަލަތައްވެސް އެކުއެކީ ބަލަމުންދާކަމަށް ވިދާޅުވިއެވެ.
އަދި ކުރިއަށް އޮތްތާނުގައި މަސައްކަތްތައް ބައްޓަންކުރާނީ، މައްސަލަތައް ފުނި ނުޖެހި، ވީހާވެސް އަވަހަށް މައްސަލަތައް ބަލާ ނިންމޭނެ ގޮތަށް ކަމަށްވެސް ވިދާޅުވިއެވެ.
ކިޔުންތެރިންގެ ހިޔާލު