ހުޅުމާލެ ދެވަނަ ފިޔަވަހީގައި ހުންނަ ‘އަމާން އުދަރެސް’ 5ވަނަ ޓަވަރުގެ ގްރައުންޑް ފްލޯރގައި ރޯވި އަލިފާން ނިއްވާލައިފިއެވެ.
އެމްއެންޑީއެފްއިން ވިދާޅުވީ، އަމާން އުދަރެސް 5ވަނަ ޓަވަރުގެ ގްރައުންޑް ފްލޯރގައި، ގުދަނެއް ގޮތަށް ތައްޔާރުކޮށްފައި ހުރި މި ތަނުގައި ރޯވެ ހިނގި ހާދިސާގެ މަޢުލޫމާތު، އެމްއެންޑީއެފް މާލޭ އޭރިއާ ކޮމާންޑް، ހުޅުމާލެ ފަޔަރ ސްޓޭޝަނަށް ލިބިފައިވަނީ މިރޭ 18:43 ހާއިރު ކަމަށެވެ. އަދި ހާދިސާގެ މަޢުލޫމާތު ލިބުމާއެކު، ހުޅުމާލެ ފަޔަރ ސްޓޭޝަނުގެ ފަޔަރ ފައިޓަރުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައިވާ ކަމަށެވެ. މިގޮތުން، ފަޔަރ ފައިޓަރުން ކުރި މަސައްކަތުން އަލިފާން ނިއްވާލެވުނީ، 18:50 ހާއިރު ކަމަށްވެސް އެމްއެންޑީއެފްއިން މައުލޫމާތުދެއްވައެވެ.
މި ހާދިސާގައި އެއްވެސް މީހަކަށް އަނިޔާވިކަމުގެ މަޢުލޫމާތު ލިބިފައެއް ނުވެއެވެ.
ނަމަވެސް މި ހާދިސާގައި ޓަވަރުގެ ބައެއް ފެންހޮޅިތަކަށް ގެއްލުން ލިބިފައިވާތީ، އެ ހޮޅިތައް މަރާމާތުކުރުމުގެ މަސައްކަތް އެފްޑީސީގެ ޓީމުން މިހާރު ކުރަމުންދާ ކަމަށް ފަހިދިރިއުޅުން ކޯޕަރޭޝަނުން ވިދާޅުވެއެވެ.
އަދި މަރާމާތުގެ މަސައްކަތް ނިމެންދެން އެ ޓަވަރުގެ ބައެއް ޔުނިޓުތަކަށް ފެނާއި ކަރަންޓުގެ ޚިދުމަތް މެދުކެނޑޭނެ ކަމަށާއި، މި މަސައްކަތް ކުރިއަށް އޮތް 2 އާއި 3 ގަޑިއިރުގެ ތެރޭގައި ނިންމައި، ޚިދުމަތްތައް އަލުން އިއާދަކުރެވޭނެ ކަމަށް ލަފާކުރެވޭ ކަމަށްވެސް ފަހިދިރިއުޅުން ކޯޕަރޭޝަނުން މައުލޫމާތުދެއްވައެވެ.
ކިޔުންތެރިންގެ ހިޔާލު