މަދީނާ އިންޖީނުގެއަށް ޔަމަނުގެ ހޫޘީން ދިން ހަމަލާތައް އިސްލާމީ ގައުމުތަކުން ވަރަށް ބޮޑަށް ކުށްވެރި ކުރަމުން އެބަ ގެންދެއެވެ.
މަދީނާ އިންޖީނުގެއަކީ މަދީނާގައި ހުންނަ މުސްލިމުންގެ ދެވަނައަށް އެންމެ މުގައްދަސް ބިނާކަމުގައިވާ މަސްޖިދުއް ނަބަވީއަށް ކަރަންޓް ފޯރުކޮށްދޭ އިންޖީނުގެވެސް މެއެވެ.
އެ އިންޖީނުގެއަށް ހޫޘީން ދިން ވައިގެ ހަމަލާތަކުގައި ބޮޑެތި ގެއްލުންތައް ލިބިފައިވާ ކަމަށް ސައުދީ ކަމާބެހޭ ފަރާތްތަކުން ހާމަކޮށްފައި ވެއެވެ.
އަދި އިންޖީނުގެއަށް ލިބިފައިވާ ގެއްލުންތައް ފެންނަ ފޮޓޯތަކާއި ވީޑިއޯތައްވެސް އާންމުވެފައި ވެއެވެ.
ޕާކިސްތާނުފެ ފޮރިން އޮފީހުން މިއަދު ނެރުނު ބަޔާނެއްގައި މި ހަމަލާ ވަރަށް ބޮޑަށް ކުށްވެރިކޮށް ބުނެފައިވަނީ، މިއީ ސީދާ މުސްލިމުން ރުޅިއަރުން ދޭ ހަމަލާތަކެއް ކަމަށާއި، މިއީ މުސްލިމުންގެ މެދުގައި ކަންބޮޑުވުމަކާއި ނުތަނަވަސްކަން އުފެއްދުމަށް ދޭ ހަމަލާތަކެއް ކަމަށެވެ.
ސަރަހައްދުގެ ސުލްހައާއި ސަލާމަތަށް ބޮޑު ނުރައްކަލެއް ކުރިމަތިވާ މިފަދަ ޒިންމާދާރުކަން ކުޑަ އަމަލުތައް އެއްވެސް ޝަރުތަކާ ނުލައި ވަގުތުން ނިމުމަކަށް ގެނައުމަށްވެސް ޕާކިސްތާނު ސަރުކާރުގެ ފޮރިން އޮފީހުން ގޮވާލާފައި ވެއެވެ.
ދެ ޙަރަމް ރައްކާތެރިކޮށް، އެތަންތަނަށް އަޅުކަމަށްދާ މީހުން ހިމާޔަތްކޮށް، ރައްކާތެރިކަން ކަށަވަރުކުރުމަށް ސައުދީން ކުރަމުންދާ މަސައްކަތުގައި ޕާކިސްތާނުގެ ފުރިހަމަ ތާއީދު އަބަދުވެސް އޮންނާނޭ ކަމަށްވެސް ބުނެފައި ވެއެވެ.
ހޫޘީން މަދީނާ އިންޖީނުގެއަށް ދިން ހަމަލާ ކުށްވެރިކޮށް ބަހްރެއިންގެ ޝޫރާ ކައުންސިލުން ނެރުނު ބަޔާނުގައި ބުނެފައިވަނީ، މިއީ، ސީދާ އިސްލާމީ މާތް ތަންތަނުގެ މުގައްދަސްކަމަށް ފާޅުކަން ބޮޑު ގޮތެއްގައި ޚިލާފުވުމުގެ އަމަލެއް ކަމަށާއި، މިއީ ދުނިޔޭގެ މުސްލިމުންގެ ޝުއޫރުތަކަށް ދިން ހަމަލާއެއް ކަމަށެވެ.
ދުނިޔޭގެ އިސްލާމީ އެހެން ގައުމުތަކުންވެސް ހޫޘީން ދިން ހަމަލާތައް ވަރަށް ބޮޑަށް ކުށްވެރި ކުރަމުން އެބަ ގެންދެއެވެ.
މީޑިއާ ރިޕޯޓްތައް ބުނާގޮތުން މަދީނާ އިންޖީނުގެއަށް ހަމަލާދިން ކަމަށް ޔަމަނުގެ ހޫޘީން އެއްބަހެއް ނުވެއެވެ.
ކިޔުންތެރިންގެ ހިޔާލު