ހުޅުދޫއާއި މީދޫ ހިމެނޭހެން މުޅި އައްޑު އަތޮޅުގެ ކަރަންޓުގެ އެންމެހާ ޚިދުމަތްތައް ސްޓެލްކޯގެ ދަށަށް ބަދަލުކޮށްފިއެވެ.
އިއްޔެވަނީ އައްޑޫގެ ގުޅިފައިވާ ރަށްތަކުގެ ކަރަންޓު ވިއުގަ ބެލެހެއްޓުމާ ސްޓެލްކޯއިން ރަސްމީކޮށް ހަވާލުވެފައެވެ. މިހާރު މިވަނީ އެ އަތޮޅުގައި ވަކި އިދާރި ދެ ރަށުގައި ގޮތުގައި އޮންނަ އައްޑޫ ހުޅުދޫއާއި އައްޑޫ މީދުގެ ކަރަންޓުގެ ވިއުގަ ބެލެހެއްޓުމާވެސް ސްޓެލްކޯއިން ހަވާލުވެފައެވެ.
މި ޚިދުމަތް ރަސްމީކޮށް ސްޓެލްކޯއާ ހަވާލުކުރީ، ކުންފުނީގެ މެނޭޖިންގ ޑިރެކްޓަރ ޑރ. ޢަލީ އަޒުވަރާއި ކުންފުނީގެ ބައެއް އިސްވެރިން މިއަދު އައްޑޫ ހުޅުދޫއާއި އައްޑޫ މީދޫއަށް ކުރެއްވި ޒިޔާރަތުގައި އެ ދެ ރަށުގައި ބޭއްވި ޚާއްސަ ރަސްމިއްޔާތެއްގައެވެ.
ޚިދުމަތް ރަސްމީކޮށް ފެށުމުގެ ގޮތުން ބޭއްވި ޚާއްޞަ ރަސްމިއްޔާތުގައި، ޤައުމީ ދިދަ ނަންގަވައިދެއްވީ މެނޭޖިންގ ޑިރެކްޓަރ ޑރ. ޢަލީ އަޒުވަރުއެވެ. އަދި ސްޓެލްކޯގެ ދިދަ ނަންގަވައިދެއްވީ ޑެޕިއުޓީ މެނޭޖިންގ ޑިރެކްޓަރ ޢާއިޝަތު މުޒްނާއެވެ. ދިދަ ނެންގެވުމުގެ ރަސްމިއްޔާތަށްފަހު، މެނޭޖިންގ ޑިރެކްޓަރާއި އިސްވެރިން ވަނީ އެ ދެ ރަށުގެ އިންޖީނުގެއާއި އޮފީހުގެ މަސައްކަތްތައް ހިނގަމުންދާ ގޮތް ބައްލަވާލައްވާފައެވެ. އަދި އިންޖީނުގޭގެ ހިންގުމާއި ޚިދުމަތްތަކާއި ގުޅޭގޮތުން މަޝްވަރާކުރެއްވިއެވެ.
އެ ދެރަށުގެ އާބާދީއަކީ ގާތްގަނޑަކަށް 7،000 މީހުންނެވެ. މި ދެ ރަށް އައްޑޫ ސިޓީ ކައުންސިލްގެ ދަށުން ވަކިވެ، އިދާރީ ވަކި ދެ ރަށުގެ ގޮތުގައި ހިންގުމަށް ނިންމީ މިދިޔަ އަހަރުގެ ޑިސެމްބަރު މަހުއެވެ.
ސްޓެލްކޯއިން އިއްޔެވަނީ އައްޑޫގެ ގުޅިފައިވާ ރަށްތަކުގެ ސެންޓްރަލް އިންޖީނުގޭގެ ބެލެހެއްޓުންވެސް އެ ކުންފުނީގެ ދަށުން ރަސްމީކޮށް ހިންގުމަށް ފަށާފައެވެ.
އައްޑޫގައި މި ވޭތުވެދިޔަ އަހަރުތަކުގައި ކަރަންޓުގެ ޚިދުމަތް ދިނީ ފެނަކައިންނެވެ. ނަމަވެސް ސަރުކާރުން ދާދިފަހުން ވަނީ ފެނަކަ އުވާލާ، ފެނަކައިގެ އެންމެހާ ޚިދުމަތްތައް ސްޓެލްކޯގެ ދަށަށް ގެންދިއުމަށް ނިންމާފައެވެ.
އައްޑޫ ސިޓީ ސެންޓްރަލް ޕަވަރ ސްޓޭޝަނަކީ ގަން ހިމަނައިގެން ޖުމްލަ 5 އަވަށަށް ކަރަންޓުގެ ޚިދުމަތް ދިނުމަށް މިވަގުތު ބޭނުންކުރަމުން އަންނަ ސްޓޭޝަނެކެވެ. މީގެ ތެރޭގައި އައްޑޫ ސިޓީ ހިތަދޫ، މަރަދޫ، މަރަދޫ ފޭދޫ، ފޭދޫ އަދި ގަން ހިމެނެއެވެ.
އައްޑޫގެ ކަރަންޓު ކެޕޭސިޓީ އިތުރުކޮށް، އެ ސިޓީގެ އަވަށްތަކަށް ދިމާވާ ކަރަންޓުގެ މައްސަލަ ޙައްލުކުރުމަށް، އައު އިންޖީނުގެއެއް ތަރައްޤީކުރުމުގެ މަސައްކަތް ދަނީ ކުރަމުންނެވެ.
ކަރަންޓުގެ މައްސަލައަށް ދާއިމީ ހައްލެއް ގެނައުމަށްޓަކައި، އައްޑޫ ސިޓީގައި ސެންޓްރަލް ޕަވަރ ސްޓޭޝަނެއް ގާއިމްކުރުމަށް ދުބާއީގެ ކުންފުންޏެއްކަމަށްވާ ޑެފިނިޓް ސޮލިއުޝަންސްއާ ވަނީ ހަވާލުކޮށްފައެވެ.
މި މަޝްރޫޢުގެ ދަށުން އައު އިންޖީނުގެ ތަރައްޤީކުރުމާއި، 5.2 މެގަވޯޓުގެ ލޯ-ސްޕީޑު 5 ޖަނަރޭޓަރު އިންސްޓޯލްކުރުމުގެ އިތުރުން، ބެލްޖިއަމުން އޮން-ގްރައުންޑް ތަމްރީންތައް ދިނުމަށް ވަނީ ހަމަޖެހިފައެވެ. އަދި ގްރިޑަށް ކަރަންޓު ދިނުމާ ހަމައަށް ކުރަންޖެހޭ ހުރިހާކަމެއް ކުރުމާއި، ފިޔުލް ފާރމެއް ޤާއިމުކުރުމުގެ އިތުުރުން، ބަންކަރިންގެ ޚިދުމަތް ދިނުމަށްވެސް ހަމަޖެހިފައިވެއެވެ.
މި މަޝްރޫޢުގެ ޢަމަލީ މަސައްކަތް ނިމުމާއެކު، އައްޑޫގެ ސެންޓްރަލް ޕަވަރ ސްޓޭޝަނުގައި 26.37 މެގަވޯޓުގެ ކަރަންޓު އުފެއްދުމުގެ ޤާބިލްކަން ހުންނާނެއެވެ. މިއާއެކު 20 އަހަރަށް ދަތިނުވާ ވަރަށް އައްޑޫ ސިޓީގައި ކަރަންޓު ކެޕޭސިޓީ ހުންނާނެކަމަށް ސަރުކާރުން ވިދާޅުވެއެވެ.
ކިޔުންތެރިންގެ ހިޔާލު