މަގު ކޮނުމުގެ މަސައްކަތްތަކުގެ ތެރެއިން ސްޓޭޓް އިލެކްޓްރިކް ކޮމްޕެނީ (ސްޓެލްކޯ)ގެ ކަރަންޓު ކޭބަލްތަކަށް ގެއްލުންވެއްޖެނަމަ، އެކަމުގެ ސަބަބުން ހިނގާ ޚަރަދު އިހުމާލުވި ފަރާތަކުން ދޭންޖެހޭ ގޮތަށް އެ ކުންފުނިން ނިންމައިފިއެވެ.
ސްޓެލްކޯއިން ވިދާޅުވީ، އެ ކުންފުނީގެ ކަރަންޓު ވިއުގައިގައި ހިމެނޭ ކޭބަލްތަކަށް، މަގު ކޮނުމުގެ އެކި މަސައްކަތްތަކުގެ ތެރެއިން ގެއްލުންވެ، ކަރަންޓުގެ ޚިދުމަތް މެދުކެނޑުމުގެ ސަބަބުން ރައްޔިތުންނަށް އެތަކެއް ތަކުލީފުތަކަކާއި ދަތިތަކަކާ ކުރިމަތިވަމުންދާ ކަމަށެވެ. އަދި މިފަދަ ހާދިސާތައް ދުވަހެއް ދުވަހަކަށް އިތުރުވަމުންދާކަން ވެސް އެ ކުންފުނިން ފާހަގަކުރެއެވެ.
އެހެންކަމުން، މަގު ކޮނުމުގެ މަސައްކަތްތައް ކުރިއަށްގެންދާ ފަރާތްތަކުގެ އިހުމާލުން މިފަދަ ކަމެއް ދިމާވެއްޖެ ޙާލަތެއްގައި، އެ ފަރާތެއް ޒިންމާދާރު ކުރުވައި، އެ މައްސަލަ ޙައްލުކޮށް އަލުން ޚިދުމަތް ދިނުމަށް ހިނގާ ޚަރަދު އެ ފަރާތަކުން ނެގުމަށް ވަނީ ނިންމާފައި ކަމަށެވެ.
ސްޓެލްކޯއިން ބުނި ގޮތުގައި މިއީ ކަރަންޓުގެ ޚިދުމަތް މެދުކެނޑުމުގެ ސަބަބުން ޢާންމު ރައްޔިތުންނަށް ދިމާވާ ދަތި އުނދަގޫތަކުން ސަލާމަތްކޮށް، ޚިދުމަތުގެ ފެންވަރު ދެމެހެއްޓެނިވި ގޮތެއްގައި ފޯރުކޮށްދިނުމުގެ މަޤްޞަދުގައި ނިންމި ނިންމުމެކެވެ.
ސްޓެލްކޯއިން ވަނީ މަގު ކޮނުމުގެ އެންމެހާ މަސައްކަތްތައް ކުރިއަށްގެންދާ ހުރިހާ ފަރާތްތަކުން ވެސް އެ ކުންފުނީގެ ކަރަންޓު ވިއުގައަށް ގެއްލުން ނުވާނެހެން ޒިންމާދާރުކަމާއެކު މަސައްކަތްތައް ރާވައިގެން ކުރިއަށްގެންދިއުމަށް އިލްތިމާސްކޮށްފައެވެ.
މި މަހުގެ 28 ވަނަ ދުވަހު އަމިއްލަ ފަރާތަކުން ކުރިއަށްގެންދިޔަ ޢިމާރާތްކުރުމުގެ މަސައްކަތެއްގެ ތެރެއިން ބިންކޮނުމުގެ ތެރޭގައި ހައިވޯލްޓޭޖް ކޭބަލަކަށް ގެއްލުންވުމާ ގުޅިގެން ހުޅުމާލޭގެ ފުރަތަމަ ފިޔަވަހީގެ ބައެއް ސަރަޙައްދުތަކުން ވަނީ ކަރަންޓު ކެނޑިފައެވެ. މިފަދަ ހާދިސާއެއް މިދިޔަ ބުރާސްފަތި ދުވަހު ވެސް ވަނީ ހިނގާފައެވެ.
އެހެންކަމުން، ޢިމާރާތްކުރުމާއި މަގުކޮނުމުގެ މަސައްކަތްތައް ކުރިއަށްގެންދަވާ ހުރިހާ ފަރާތްތަކުން ވެސް މިހާރަށްވުރެ ބޮޑަށް ޒިންމާދާރުވެ، ބިމުގެ އަޑީގައިވާ ކަރަންޓު ވިއުގައަށް އެއްވެސް ގެއްލުމެއް ނުވާނޭހެން މަސައްކަތްތައް ރާވައިގެން ކުރިއަށް ގެންދިއުމަށް ސްޓެލްކޯއިން ވަނީ އިލްތިމާސްކޮށްފައެވެ.
ކިޔުންތެރިންގެ ހިޔާލު