ހޮރްމޫޒު ކަނޑުއޮޅިން ދަތުރުކުރި އުޅަނދަކަށް އަނެއްކާވެސް ހަމަލާ ދީފިއެވެ.
ޔޫކޭ މެރިޓައިމް ޓްރޭޑް އޮޕަރޭޝަންސް ސެންޓަރުން ބުނެފައިވަނީ، ހޮރްމޫޒު ހުރަސްކުރަންދިޔަ އުޅަނދަކަށް ވައިގެ ހަމަލާއެއް ދީފައިވާ ކަމުގެ ރިޕޯޓް ލިބިފައިވާ ކަމަށާއި، ހަމަލާގެ ސަބަބުން އުޅަނދުގައި އަލިފާން ރޯވި ނަމަވެސް، އަލިފާން ވަގުތުން ނިއްވާލާފައިވާ ކަމަށްވެސް ބުނެފައި ވެއެވެ. އަދި އުޅަނދުގެ ފަޅުވެރިންވެސް ތިބީ ސަލާމަތުން ކަމަށް ބުނެފައި ވެއެވެ.
ނަމަވެސް، އުޅަނދަށް ހަމަލާދިނީ ކޮން ބައެއް ކަމެއް ސާފު ނުވާ ކަމަށްވެސް ބުނެފައި ވެއެވެ.
ހޮރްމޫޒު ކަނޑުއޮޅި ކޮންޓްރޯލް ކުރުމާ ގުޅޭގޮތުން އެމެރިކާއާއި އީރާނާ ދެމެދު ވަރުގަދަ އަރާރުންތަކާއި، ކުރިމަތިލުންތައްވެސް ދަނީ ހިނގަމުންނެވެ.
ހޮރްމޫޒު ކަނޑުއޮޅީގެ ފުރިހަމަ ކޮންޓްރޯލް އޮތީ އީރާނަށް ކަމަށް އީރާނުގެ ނުފޫޒުގަދަ އިންގިލާބީ ލަޝްކަރުގެ އިސް ކޮމާންޑަރަކު އިއްޔެ ވިދާޅުވުމުން، އެމެރިކާގެ ސެންޓްރަލް ކޮމާންޑުން ބުނެފައިވަނީ އެއީ ކަނޑައެޅިގެން ދޮގެއް ކަމަށެވެ.
އީރާނުން ގެންދަނީ އެގައުމުގެ ހުއްދަނެތި ހޮރްމޫޒު ހުރަސްކުރާ ތެޔޮ ޓޭންކަރުތަކާއި، އާގު ބޯޓުފަހަރަށް ހުރަސްއަޅަމުންނެވެ. އީރާނުގެ ކަނޑުގެ ސިފައިންގެ އަމުރަށް ނުކިޔަމަންތެރިވާ އުޅަނދުފަހަރަށް ހަމަލާދެމުންވެސް ގެންދެއެވެ.
އުމާނާ ގާތުން އެމެރިކާ ސިފައިން ކަނޑައަޅާފައިވާ ސަދަން ރޫޓުން އެމެރިކާ ސިފައިން ހިމާޔަތް ދީގެން ދަތުރުކުރާ އުޅަނދުފަހަރަށްވެސް އީރާނުން ހަމަލާދެމުން ގެންދެއެވެ.
ކިޔުންތެރިންގެ ހިޔާލު