ދިވެހި ފުލުހުންގެ ޚިދުމަތުގެ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުން ކުރިއަށްގެންދާ އިންވެސްޓިގޭޝަން އޮފިސަރ ކޯހުގެ 32 ވަނަ ބުރު ރަސްމީކޮށް ފަށައިފިއެވެ.
ފުލުހުންގެ އިދާރާއިން މައުލޫމާތު ދިން ގޮތުގައި، މި މަހުގެ 27 ވަނަ ދުވަހު ދ. ވާނީގައި ފެށި މި ކޯހުގައި ޖުމްލަ 25 ފުލުހުން ބައިވެރިވިއެވެ. މިއީ މައްސަލަތައް ތަހުގީގުކުރާ އިންވެސްޓިގޭޝަން އޮފިސަރުން އުފެއްދުމަށާއި، މިހާރު ތިބި އޮފިސަރުންގެ ގާބިލުކަން އިތުރަށް ތަރައްގީކޮށް، ކްރިމިނަލް އިންވެސްޓިގޭޝަން ދާއިރާއިން ބޭނުންވާ އިލްމާއި ހުނަރު އުނގަންނައިދިނުމުގެ މަގުސަދުގައި ހާއްސަކޮށް ފަރުމާކުރެވިގެން ހިންގާ މުހިންމު ތަމްރީނު ޕްރޮގްރާމެއް ކަމަށް ފުލުހުން ބުންޏެވެ.
ފުލުހުން ބުނީ، މި ކޯހުގައި މައިގަނޑު ގޮތެއްގައި ކިޔަވައިދިނުމަށް ހަމަޖެހިފައިވާ ބައިތަކުގެ ތެރޭގައި ކުށުގެ ވެށި ތަޙުޤީޤުކުރުން (ކްރައިމް ސީން އިންވެސްޓިގޭޝަން)، ތަހުގީގީ ބަޔާން ނެގުމާއި އިންޓަވިއު ކުރުން (އިންވެސްޓިގޭޓިވް އިންޓަވިއުއިންގ)، ހެކި ހޯދައި އެއްކުރުން (ގެދަރިންގ އެވިޑެންސް) އަދި ތައްޔާރުކުރާ މައްސަލަތައް ހުށަހެޅުން (ކޭސް ޕްރެޒެންޓޭޝަން) ހިމެނެއެވެ.
މީގެއިތުރުން، ގާނޫނީ އެކި ދާއިރާތަކަށް އަހުލުވެރިކުރުމުގެ ކްލާސްތަކާއި، އިންޓަވިއު ކުރުމުގެ ހާއްސަ ހުނަރުތަކުގެ އިތުރުން ކޯޓުގެ އެކި މަރުހަލާތަކުގައި މައްސަލަތައް ކުރިއަށްގެންދާނެ ގޮތްތައް އަމަލީ ގޮތުންނާއި ނަޒަރީ ގޮތުން އުނގަންނައިދެވޭނެ ކަމަށް ވެސް ފުލުހުންގެ އިދާރާއިން މައުލޫމާތުދެއެވެ.
ފުލުހުން އިތުރަށް ބުނީ، މި ކޯހުގެ ކިޔެވުމާއި އަމަލީ ތަޖުރިބާގެ ބައި ކަމުގައިވާ އެޓޭޗްމަންޓް ފުރިހަމަކުރުމުން، ޖިނާއީ މައްސަލަތައް އެންމެ ފުރިހަމަ ގޮތުގައި ތަހުގީގުކުރުމަށް ބޭނުންވާ ފުރިހަމަ ގާބިލުކަމާއި ހުނަރު މި ކޯހުގެ ބައިވެރިންނަށް ލިބިގެންދާނެ ކަމަށެވެ.
ކިޔުންތެރިންގެ ހިޔާލު