ރާއްޖޭގައި ހިންގުމަށް ހަމަޖެހިފައިވާ އެންމެ ބޮޑު އިންވެސްޓްމެންޓް މަޝްރޫއު ހިންގުމުގެ ފުރުސަތު ލިބުމަކީ ކުންފުންޏަށް ލިބުނު ބޮޑު ފަހުރެއް ކަމަށާއި ދިވެހިންގެ އުއްމީދުތަކާ އެއްގޮތަށް މަސައްކަތް ކުރައްވާނެ ކަމަށް ޔޫއޭއީގެ އީގަލް ހިލްސް ކުންފުނީގެ ޗެއާމަން މުހައްމަދު އަލައްބާރު އިންސްޓަގްރާމް މެދުވެރިކޮށް އާންމުކުރެއްވި މެސެޖެއްގައި ވިދާޅުވެއްޖެއެވެ.
މި މެސެޖަކީ ރަސްމާލޭގައި 20 ބިލިއަން އެމެރިކާ ޑޮލަރުގެ ބިޔަ މަޝްރޫއެއް ހިންގުމަށް ދިވެހި ސަރުކާރާއެކު ވެވުނު އެއްބަސްވުމާ ގުޅިގެން އޭނާ ހިއްސާކުރެއްވި މެސެޖެކެވެ. އާޓިފިޝަލް އިންޓެލިޖެންސްގެ އެހީގައި ތައްޔާރުކޮށްފައިވާ ވީޑިއޯއަކާއެކު އާންމުކުރި މި މެސެޖުގައި، ދިވެހިން އީގަލް ހިލްސްއަށް ކުރި އިތުބާރަށް އަލައްބާރު ވަނީ ޝުކުރު އަދާކުރައްވައިފައެވެ.
ދިވެހި ސަރުކާރާއި އީގަލް ހިލްސް ކުންފުންޏާ ދެމެދު މި ތާރީހީ އެއްބަސްވުމުގައި ސޮއިކޮށްފައިވަނީ އަބޫދާބީގައެވެ. މި މަޝްރޫއުގެ ދަށުން ރަސްމާލޭގައި ޒަމާނީ މެރީނާއަކާއި ދުނިޔޭގެ ފެންވަރުގެ ވޯޓަފްރަންޓް ސިޓީއެއް ތަރައްގީކުރުމަށް ވަނީ ނިންމައިފައެވެ.
އަލައްބާރު ވިދާޅުވި ގޮތުގައި، ﷲ އިރާދަކުރެއްވިއްޔާ ދިވެހި ރައްޔިތުންގެ އުއްމީދުތަކާ އެއްގޮތަށް މަސައްކަތްކޮށް، އެތަން ތަރައްގީ ކުރާނީ ހުރިހާ ހިދުމަތްތަކާއި ވަސީލަތްތައް ފުރިހަމައަށް އެކުލެވޭ ގޮތަށެވެ. އެގޮތުން އެ ސިޓީގައި ރީތި ގޮނޑުދޮށްތަކާއި، ރެސްޓޯރެންޓްތަކާއި، ހޮޓާތަކުގެ އިތުރުން ކުޅިވަރު ކުޅޭނެ ތަންތަނާއި ކުޑަކުދިންނަށް ހާއްސަ ވަސީލަތްތައް ގާއިމުކުރެވޭނެއެވެ.
މި މަޝްރޫއު ނިމުމުން އެތަނުން ޕްރޮޕަޓީއެއް ގަންނަ ފަރާތްތަކަށް، މުޅި ދުނިޔޭގެ ފެންވަރުގައިވެސް އެފަދަ ވިޔަފާރިއަކުން ލިބޭނެ އެންމެ ރަނގަޅު މާލީ ފައިދާ ލިބިގެންދާނެ ކަމުގެ ޔަގީންކަންވެސް އީގަލް ހިލްސްގެ ޗެއާމަން ވަނީ ދެއްވައިފައެވެ.
ކިޔުންތެރިންގެ ހިޔާލު