އިނގިރޭސި އެއަރ ބޭހަށް ދޭން އުޅުނު ކަމަށް ބުނާ ހަމަލާ ރޭވުމުގައި އީރާނުގެ އަތެއް ވާކަމަށް ބުނެ ފަތުރަމުންދާ ވާހަކަތައް އީރާނުން ދޮގުކޮށްފިއެވެ.
އިނގިރޭސިވިލާތުގައި ހުންނަ އީރާނު އެމްބަސީން ނެރުނު ބަޔާނެއްގައި، ރޯޔަލް އެއަރފޯސް ފެއަރފޯޑް ބޭހަށް ދޭން އުޅުނު ކަމަށްބުނާ ހަމަލާތަކާއި އީރާނާ ގުޅުވައި ދައްކާ ވާހަކަތައް ވަރަށް ހަރުކަށި އިބާރާތުން ކުށްވެރި ކޮށްފައި ވެއެވެ. ބުނެފައިވަނީ އެއީ އީރާނާ އެއްވެސް ގުޅުމެއް ހުރި ކަމެއް ނޫން ކަމަށެވެ.
އެކްސްގައި ޕޯސްޓްކުރި ބަޔާނެއްގައި އީރާނު އެމްބަސީންވަނީ، އެ ހާދިސާއާ އީރާނާ ގުޅުވައި އިނގިރޭސިވިލާތުގެ ބައެއް ފަރުދުންނާއި މީޑިއާތަކުން ޝާއިއުކުރަމުންދާ ރިޕޯޓްތައް ކުށްވެރިކޮށް އަދި އެއީ އެއްވެސް އަސާސެއްނެތް ނުބައި ޝައްކުތަކެއް ކަމަށް ބުނެފައެވެ.
އަދި އީރާނާއި، އީރާނު ރައްޔިތުންގެ ހައްގުތަކާއި މަސްލަހަތުތައް ރައްކާތެރި ކުރުމަށްޓަކައި، އީރާނާ ގުޅުވައި މިފަދަ ސާބިތު ނުހިފޭ ދޮގާއި އޮޅުވާޅުމުގެ ވާހަކަތައް ފަތުރާ ފަރާތްތަކާ ދެކޮޅަށް ގާނޫނީ ފިޔަވަޅު އަޅާނެކަމުގެ އިންޒާރުވެސް ދީފައިވެއެވެ.
އިނގިރޭސިވިލާތުގެ ރޯޔަލް އެއަރފޯސް ފެއަރފޯޑް ބޭހަކީ، އީރާނަށް ބޮން އެޅުމަށް އެމެރިކާ ސިފައިން ބޭނުންކުރި އެއަރ ބޭހެކެވެ. އީރާނަށް ބޮންއަޅަން އެމެރިކާއިން ބޭނުންކުރި ބީ-1 މަތިންދާ ބޯޓުތައް ބަހައްޓާފައި ހުންނަނީވެސް މި ބޭހުގައެވެ.
ފެއަރފޯޑް ކައިރި މަގެއްގައި 3 ވޭނެއްގައިގޮސް، މޫނު ނިވާކޮށްގެން ތިބި ބަޔަކު ހަރަކާތްތެރި ވަނިކޮށް އެކަން ރިޕޯޓްކުރީ އާންމު މީހެކެވެ.
އިނގިރޭސި ސަލާމަތީ ބާރުތަކުންވަނީ 5 މީހަކު ހައްޔަރު ކޮށްފައެވެ. އަދި އެމީހުން ބޭނުންކުރި ވޭންތަކުން ގިނަ އަދަދެއްގެ ގޮވާތަކެތި ފެނިފައިވާ ކަމަށް ބުނެފައި ވެއެވެ.
މޫނު ނިވާކޮށްގެން ތިބި މީހުން މަސައްކަތް ކުރީ އެއަރ ބޭހުގެ ތެރެއަށް ވަދެގަނެ، ބޮންއަޅާ ބޯޓުތަކުގައި ގޮވާތަކެތި ހަރުކޮށް ގޮއްވާލަން ކަމަށް އިނގިރޭސި ސަލާމަތީ ފަރާތްތަކުން ތުހުމަތު ކުރެއެވެ.
ހައްޔަރުކުރި މީހުންނާ ގުޅޭގޮތުން އަދި އެއްވެސް އެއްޗެއް ހާމަކޮށްފައެއް ނުވެއެވެ.
ކިޔުންތެރިންގެ ހިޔާލު