މާލެ ސަރަހައްދުގައި އުފެދޭ ކުނި މަދުކޮށް ފަރުވާތެރިކަމާއެކު އުޅެން ފަށައިފިނަމަ ކުނި އުކައިލުމުގެ ޚިދުމަތަށް ހިނގާ ޚަރަދުން އަހަރަކު ސާޅީސް މިލިއަން ރުފިޔާ ސަލާމަތްކުރެވޭނެ ކަމަށް މާލޭގެ މޭޔަރު އާދަމް ޢާޒިމް ވިދާޅުވެއްޖެއެވެ.
ދުނިޔޭގެ ސާފުކުރުމުގެ ދުވަހާ ގުޅުވައިގެން މާލޭ ސިޓީ ކައުންސިލާއި އެހެނިހެން ޖަމުޢިއްޔާ ޖަމާޢަތްތައް ގުޅިގެން އާޓިފިޝަލް ބީޗު ސަރަހައްދު ސާފުކުރުމަށް ބޭއްވި ހަރަކާތް ފެށުމުގެ ކުރިން ދެއްކެވި ވާހަކަފުޅުގައި މޭޔަރު މިހެން ވިދާޅުވީ މާލޭގައި ކުނި މެނޭޖުކުރުމަށް ބޮޑު ޚަރަދެއް ކުރަންޖެހިފައިވާކަން ފާހަގަކުރައްވަމުންނެވެ.
މާލޭގައި ކުނި އުކައިލުމުގެ ޚިދުމަތް ދިނުމަށްޓަކައި ކައުންސިލުން މަހެއްގެ މައްޗަށް ތިން މިލިއަނާއި ފަސް މިލިއަން ރުފިޔާއާ ދެމެދުގެ ޢަދަދަކަށް ޚަރަދުކުރަންޖެހޭ ކަމަށް މޭޔަރު ވިދާޅުވިއެވެ. އަދި މިގޮތަށް ނެގޭ ކުނިތަކަކީ އިންސާނުންގެ އިހުމާލުން މަގުމައްޗާއި ތަފާތު ސަރަހައްދުތަކަށް އަޅާ ކުނިކަން ފާހަގަކުރައްވައި، މާލޭގައި ދިރިއުޅޭ ރައްޔިތުން މިކަމަށް ޚާއްސަ ސަމާލުކަމެއް ދިނުމަށް އޭނާ އެދިވަޑައިގަތެވެ.
މާލެ ސިޓީ ކައުންސިލުން އުކައިލަން ގެންދާ ކުނިތަކަށް ވެމްކޯއިން އިތުރު ފީއެއް ނަގާކަން ފާހަގަކުރައްވަމުން މޭޔަރު ވިދާޅުވީ އާންމު ފަރާތަކުން ކުނި އުކައިލަން ގެންދާއިރު ނަގާ އަގަށްވުރެ ކައުންސިލްގެ އަތުން ބޮޑު އަގެއް ނަގާ ކަމަށެވެ. އެހެންކަމުން ރައްޔިތުން ކުނިމެނޭޖުކުރުމުގައި ޒިންމާދާރުވެއްޖެނަމަ، އެ ފައިސާ ރައްޔިތުންނަށް އިތުރު ޚިދުމަތްތައް ދިނުމަށް ސަލާމަތްކުރެވޭނެ ކަމަށް އޭނާ ވިދާޅުވިއެވެ.
ކުނި ނޭޅުމަށާއި، ބޭނުންނުވާ ވަރަށް ކާބޯތަކެތި ނުއުފެއްދުމަށް މޭޔަރު ވަނީ އިލްތިމާސްކުރައްވާފައެވެ. އަދި ކަރަންޓު ފޮށިތައް މައްޗަށާއި ޑަސްބިންތަކުގެ ބޭރަށް ކުނި އެޅުމުގެ އާދަ ހުއްޓައިލައި، ކޮންމެ މީހަކުވެސް އަމިއްލައަށް ކުނި މެނޭޖުކުރަން ދަސްކުރުމަށް މޭޔަރު އާދަމް ޢާޒިމ୍ ގޮވައިލެއްވިއެވެ.
ކިޔުންތެރިންގެ ހިޔާލު