ދިވެހިރާއްޖޭގެ ގައުމީ އެއާލައިން، މޯލްޑިވިއަން، އާއި ޔޫއޭއީގެ އިއްތިހާދު އެއާވޭސްއާ ދެމެދު ގުޅުން ބަދަހިކޮށް ދަތުރުވެރިންނަށް ލުއިފަސޭހަކަން ހޯދައިދިނުމުގެ ގޮތުން އައު ޕާޓްނަރޝިޕް ފަހުމްނާމާއެއްގައި ސޮއިކޮށްފިއެވެ.
މި ފަހުމްނާމާގައި ސޮއިކޮށްފައިވަނީ އެރޭބިއަން ޓްރެވަލް މާކެޓް (އޭޓީއެމް) ގެ ތެރެއިންނެވެ.
މި ޕާޓްނަރޝިޕްގެ ދަށުން، އިއްތިހާދު ގެސްޓް ލޯޔަލްޓީ ޕްރޮގްރާމްގެ މެމްބަރުންނަށް، އެމީހުންގެ އިއްތިހާދު ގެސްޓް މައިލްސް ބޭނުންކޮށްގެން މޯލްޑިވިއަންގެ ދަތުރުތަކުގެ ނެޓްވޯކްގައި ހިމެނޭ ގިނަ މަންޒިލްތަކަށް ދަތުރުކުރުމުގެ ފުރުސަތު ލިބިގެންދާނެއެވެ.
މިއީ ދިވެހިރާއްޖޭގެ އެކި ރަށްތަކަށް ދަތުރުކުރަން ބޭނުންވާ ބޭރުގެ ދަތުރުވެރިންނަށް ލިބިގެންދާނެ ވަރަށް ބޮޑު ލުއިފަސޭހައެއް ކަމަށް ދެ ކުންފުނިންވެސް ފާހަގަކުރެއެވެ.
މޯލްޑިވިއަންއިން ބުނި ގޮތުގައި، މި އެއްބަސްވުމުގެ ސަބަބުން ވެރިރަށް މާލެ ފަހަނައަޅައި ރާއްޖޭގެ އަތޮޅުތަކުގެ ދުރު ރަށްތަކަށް ދަތުރުކުރުމުގައި އިއްތިހާދު ގެސްޓް މެމްބަރުންނަށް އިތުރު ފަސޭހަތަކެއް ލިބޭނެއެވެ.
އަދި ޚާއްޞަކޮށް ރަށްރަށަށް ޒިޔާރަތްކުރާ ފަތުރުވެރިންގެ ނިސްބަތް އިތުރުވެ، ދިވެހިރާއްޖޭގެ ފަތުރުވެރިކަމުގެ ސިނާއަތަށްވެސް މިކަމުގެ ބޮޑު ފައިދާއެއް ކުރާނެ ކަމަށް އެއާލައިނުން ފާހަގަކުރެއެވެ.
ކިޔުންތެރިންގެ ހިޔާލު