ތ. ގުރައިދޫ ސިނާއީ ސަރަހައްދުގައި ބަންގްލަދޭޝްގެ ރައްޔިތެއް ކަމަށްވާ ޝާހު އަލޮމް މިއާ މަރާލި މައްސަލައިގައި އެ ގައުމުގެ ބަބުލް މިއާ އުމުރަށް ޖަލަށްލުމާއެކު މަރުގެ ދިޔައިގެ ގޮތުގައި އެއް މިލިއަން ރުފިޔާ ދެއްކުމަށް ކްރިމިނަލް ކޯޓުން ހުކުމްކޮށްފިއެވެ.
މި މައްސަލައަކީ 2020 ވަނަ އަހަރުގެ މެއި މަހުގެ ތެރޭގައި ގުރައިދޫގެ ސިނާއީ ސަރަހައްދުގައި ހިންގި ހަމަނުޖެހުމެއްގައި ތޫނު އެއްޗަކުން ހަމަލާދީ ޝާހު އަލޮމް މަރާލި މައްސަލައިގައި ދައުލަތުން ބަބުލް މިއާގެ މައްޗަށް އުފުލި ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާއެވެ.
ކްރިމިނަލް ކޯޓުގައި ކުރިއަށްދިޔަ ޝަރީއަތުގައި މައްސަލަ ބެއްލެވި ގާޒީ ވަނީ ދައުލަތުން އުފުލި ދައުވާ އެކަށީގެންވާ ޝައްކެއް ނެތް މިންވަރަށް ބަބުލް މިއާގެ މައްޗަށް ސާބިތުވާ ކަމަށް ކަނޑައަޅުއްވާފައެވެ.
މައްސަލައިގެ ހުކުމް އިއްވަވަމުން ގާޒީ ވިދާޅުވީ މަރުވި ޝާހު އަލޮމްގެ ވާރިސުންގެ ބަސް ހޯދުމުން، މަރުގެ ބަދަލުގައި މަރު ހިފަން ބޭނުންނުވާ ކަމަށާއި، ބޭނުންވަނީ މަރުގެ ދިޔަ ހޯދުމަށް ކަމަށް ވާރިސުން ބުނެފައިވާ ކަމަށެވެ. އެހެންކަމުން މަރުގެ ދިޔައިގެ ގޮތުގައި އެއް މިލިއަން ރުފިޔާ ދެއްކުމާއެކު އުމުރު ދުވަހުގެ ޖަލު ހުކުމެއް ކޯޓުން ވަނީ އިއްވާފައެވެ.
އުމުރަށް ޖަލަށްލުމަށް ހުކުމް ކުރި ނަމަވެސް، މައްސަލައިގެ ތަހުގީގަށާއި ޝަރީއަތަށް ބަބުލް މިއާ ބަންދުގައި ހޭދަކުރި މުއްދަތު ހުކުމުގެ މުއްދަތުން އުނިކުރާނެ ކަމަށް ކޯޓުން ކަނޑައެޅިއެވެ. މީގެ އިތުރުން ކައްފާރާގެ ގޮތުގައި ވިދިވިދިގެން 60 ދުވަހު ރޯދަ ހިފުމަށްވެސް ކޯޓުން ވަނީ އޭނާއަށް އަމުރުކޮށްފައެވެ.
ގުރައިދޫގެ ސައިޓެއްގެ ތެރޭގައި ހިންގި މި ހާދިސާގައި ޝާހު އަލޮމްގެ ހަށިގަނޑަށް ތޫނު އެއްޗަކުން ހަމަލާދީ ބޮޑެތި ޒަހަމްތަކެއް ދީފައިވާ އިރު، އޭނާ މަރުވީ އެ ޒަހަމްތަކުގެ ސަބަބުންނެވެ.
ކިޔުންތެރިންގެ ހިޔާލު