އީރާނުގެ ވިޔަފާރި އުޅަނދަކަށް އެމެރިކާ ސިފައިން ދިން އުދުވާނީ ހަމަލާ، އީރާނުން ވަރަށް ބޮޑަށް ކުށްވެރި ކޮށްފިއެވެ.
އެމެރިކާ ސިފައިން ވައިގެ ހަމަލާ ދީފައިވަނީ ހޮރްމޫޒު ކަނޑުއޮޅީގެ ގޭޝްމް ކައިރިން ދަތުރުކުރި ވިޔަފާރި އުޅަނދަކަށެވެ.
މި އުޅަނދަށް ދިން ހަމަލާގައި އެކަކު މަރުވެ އިތުރު ތިން މީހުން ޒަޚަމްވި ކަމަށް ގޭޝްމް ކައުންޓީގެ ގަވަރްނަރާ ހަވަލާދީ، އީރާނު ސަރުކާރުގެ މީޑިއާއިން ހާމަކޮށްފައި ވެއެވެ.
އީރާނުގެ ވިޔަފާރި އުޅަނދުފަހަރުގެ އިތުރުން، އީރާނުގެ ތެޔޮ ޓޭންކަރުތަކަށްވެސް އެމެރިކާ ސިފައިން ގެންދަނީ ވަރުގަދަ ހަމަލާތަކެއް ދެމުންނެވެ. މިފަހުން ދިން ހަމަލާތަކުގައި ބައެއް އުޅަނދުތައް ފެތިފައިވެސް ވެއެވެ.
އީރާނުންވެސް އެމެރިކާއަކަށް ދުލެއް ނުކުރެއެވެ. އެމެރިކާއަށް ނިސްބަތްވާ ތެޔޮ ޓޭންކަރުތަކާއި، އެމެރިކާ ސިފައިން ހިމާޔަތް ދީގެން ހޮރްމޫޒު ހުރަސްކުރަން އުޅޭ ހުރިހާ އުޅަނދަކަށާއި ނުވިތާކަށް އެމެރިކާގެ މަނަވަރުތަކަށްވެސް އީރާނުން ގެންދަނީ ކޮންމެ ދުވަހަކު ހަމަލާތައް ދެމުންނެވެ.
ހޮރްމޫޒު ކަނޑުއޮޅި މެނޭޖްކުރުމާ ގުޅޭގޮތުން އީރާނާއި އުމާނާ ދެމެދު ކުރި މަޝްވަރާތަކަށްފަހު އެއްބަސްވުމެއް ހަދައި މިއަދު އިއުލާން ކޮށްފައިވާއިރު، ހޮރްމޫޒު ހުޅުވާ ވާހަކައެއް އޭގައި ނެތެވެ.
މަޝްވަރާތަކުގައި ބައިވެރިވެވަޑައި ގެންނެވި އީރާނުގެ އިންގިލާބީ ލަޝްކަރުގެ އިސް ބޭފުޅަކު ވިދާޅުވީ، އީރާނުން ކަނޑައަޅާ ރޫޓުތައް ނޫން މަގަމުން ދަތުރުކުރާ ހުރިހާ އުޅަނދެއްވެސް ހުއްޓުވާނޭ ކަމަށެވެ.
ހޮރްމޫޒު ކަނޑުއޮޅީގެ ކޮންޓްރޯލް އޮތީ އެމެރިކާއަށް ކަމަށް އެމެރިކާގެ ރައީސް ޑޮނަލްޑް ޓްރަމްޕް ތަކުރާރުކޮށް ބުނަމުންގެންދާތީ އީރާނުގެ އިންގިލާބީ ލަޝްކަރުން މިއަދުވަނީ ޓްރަމްޕަށް ގޮންޖަހާފައެވެ. ބުނެފައިވަނީ، ކޮންޓްރޯލް އޮތްކަން ދައްކަން އެމެރިކާ ސިފައިންގެ މަނަވަރެއް ހޮރްމޫޒާ ސަތޭކަވަރަކަށް ކިލޯމީޓަރަށް ގާތްކޮށްލުމަށެވެ.
ކިޔުންތެރިންގެ ހިޔާލު