އެގްރޯ ނޭޝަނަލް ކޯޕަރޭޝަން (އެގްރޯނެޓް)، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ސަބްސިޑަރީ ކުންފުންޏެއްގެ ގޮތުގައި ހަމަޖެއްސުމަށް ސަރުކާރުން ނިންމެވި ނިންމެވުމާ ގުޅިގެން، ދެ ކުންފުނީގެ ހިންގުން ތަރުތީބުކުރުމުގެ މަސައްކަތްތައް ފަށައިފިއެވެ.
މިކަމާ ގުޅިގެން ދެ ކުންފުނީގެ އިސްވެރިންގެ ފުރަތަމަ ބައްދަލުވުން މިހާރު ވަނީ ބާއްވާފައެވެ. މި ބައްދަލުވުމުގެ ރިޔާސަތު ބެލެހެއްޓެވީ މިފްކޯގެ ސީއީއޯ މުޙައްމަދު އަނަސްއެވެ.
މި ބައްދަލުވުމުގެ މައިގަނޑު އަމާޒަކީ ދެ ކުންފުނީގެ މަސައްކަތްތައް އެއް އަމާޒަކަށް ގެނައުންކަމަށް މިފްކޯއިން ބުންޏެވެ. އަދި ދެ ކުންފުނި ގުޅިގެން މަސައްކަތްތައް ބައްޓަންކުރަމުންދަނީ ރާއްޖޭގެ އުފެއްދުންތެރިންނަށް ބޭނުންވާ އެހީތެރިކަން ފޯރުކޮށްދީ، ގައުމީ ފެންވަރުގައި ކާނާގެ ރައްކާތެރިކަން ކަށަވަރުކުރުމަށްކަމަށް އެ ކުންފުނިން ބުންޏެވެ.
އެގްރޯ ނެޓް ކުންފުނި މިފްކޯގެ ސަބްސިޑަރީ ކުންފުންޏެއްގެ ގޮތުގައި ބަދަލުކުރުމަށް ނިންމީ ސަރުކާރުގެ ހަރަދު ކުޑަކުރުމުގެ ސިޔާސަތުގެ ދަށުންނެވެ. މިކަން ހާމަކުރެއްވީ މި މަހުގެ ހަތް ވަނަ ދުވަހު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.
ރައީސް ވިދާޅުވީ އެގްރޯ ނެޓް ކުންފުނި މިފްކޯގެ ދަށަށް ބަދަލުކުރެވިގެންދިއުމާއެކު ދަތުރުވެރީންގެ މާރުކޭޓް ހުރި ބިމުގަ އެޅުމަށް ތައްޔަރުވަމުންދާ މާލޭ ވެޓް މާކެޓް ކޮމްޕްލެކްސްގެ ހިންގުން މިފްކޯގެ ދަށަށް ބަދަލުކުރެވި މަސްވެރިންނާއި ދަނޑުވެރިންނަށް ގިނަ ފައިދާތަކެއް ލިބިގެންދާނެކަމަށެވެ. މާލޭ ވެޓް މާކެޓް ކޮމްޕްލެކްސްގެ މަސައްކަތް އަންނަ ޑިސެމްބަރު މަހުގެ 10 އަށް ނިންމަން ސަރުކާރުން އަންނަނީ މަސައްކަތް ކުރަމުންނެވެ.
މި ބަދަލުގެ ބޭނުމަކީ ހަރަދު ކުޑަ ނިޒާމެއްގެ ތެރެއިން ރައްޔިތުން ބޭނުންވާ ހިދުމަތްތައް ފޯރުކޮށްދިނުންކަމަށް ރައީސް ވިދާޅުވިއެވެ.
ކިޔުންތެރިންގެ ހިޔާލު