ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުން ކުރިއަށް ގެންދިޔަ ދެ ކޯހަކުން 54 ފުލުހުން ދަސްވެނިވެއްޖެއެވެ.
ކޯސްތައް ފުރިހަމަކޮށް ދަސްވެރިނިވީ ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުން ކުރިއަށް ގެންދިޔަ “ފެމިލީ އެންޑް ޗައިލްޑް ސެންޓަރޑް އިންވެސްޓިގޭޝަން ކޯސް-18” ނިންމި 25 ފުލުހަކާއި، “ސީން އޮފް ކްރައިމް އޮފިސަރސް ބޭސިކް ކޯސް-7” ނިންމައި، 29 ބައިވެރިންނެވެ.
ފެމިލީ އެންޑް ޗައިލްޑް ސެންޓަރޑް އިންވެސްޓިގޭޝަން ކޯހަކީ ގެވެށި އަނިޔާއާއި ޖިންސީ ކުށުގެ އަނިޔާއަށް ހުށަހެޅޭ ފަރާތްތަކާއެކު މަސައްކަތްކުރާ ތަހުގީގު އޮފިސަރުންނަށް ޚާއްޞަ ތަމްރީނު ދިނުމަށާއި، ތަހުގީގުތަކުގައި ކުޑަކުދިންނާ ސުވާލުކުރުމުގެ ހުނަރު އިތުރަށް ތަރައްޤީކުރުމުގެ މަޤްޞަދުގައި ޖުލައި 26 އިން އޮގަސްޓު 11 ގެ ނިޔަލަށް ކުރިއަށް ގެންދިޔަ ކޯހެކެވެ. މި ކޯހުން އެއްވަނަ ހޯދާފައިވަނީ ޗީފް އިންސްޕެކްޓަރ އޮފް ޕޮލިސް ޑރ. ރިޝްވީނާ އަޙްމަދެވެ.
ސީން އޮފް ކްރައިމް އޮފިސަރސް ބޭސިކް ކޯހަކީ ކުށުގެ ވެށި ތަހުގީގުކުރުމަށް ބޭނުންވާ މުހިންމު މަޢުލޫމާތާއި، ކުށުގެ ވެށީގައި އަމަލީގޮތުން ހަރަކާތްތެރިވާނެ ގޮތުގެ ތަޖުރިބާ ފޯރުކޮށްދީ، ޤާބިލު އޮފިސަރުންތަކެއް ތަމްރީނުކުރުމަށް ފަރުމާކުރެވިގެން ކުރިއަށް ގެންދިޔަ ކޯހެކެވެ. މި ކޯހުގެ ތެރެއިން ފޮރެންސިކް ސައިންސް، މާއްދީ ހެކި، ޑީއެންއޭ، ފިންގަރޕްރިންޓް، ޑޮކިއުމެންޓް އެގްޒަމިނޭޝަން އަދި ޑިޖިޓަލް އެވިޑެންސްގެ އިތުރުން ސީން އޮފް ކްރައިމް އޮފިސަރެއްގެ ޤާނޫނީ ޒިންމާތަކާއި، ހެކި ނެގުމާއި ރައްކާތެރިކުރުމުގެ އިޖުރާއަތްތައް އުނގަންނައިދީފައިވެއެވެ. އަދި އޮފިސަރުންގެ ރިޕޯޓް ތައްޔާރުކުރުމާއި، ކޯޓުތަކުގައި ހެކިބަސްދޭނެ ގޮތްތައް ވެސް ވަނީ ދަސްކޮށްދީފައެވެ. އޮގަސްޓް 2 އިން ސެޕްޓެމްބަރު 3ގެ ނިޔަލަށް ހިންގި މިކޯހުން އެއްވަނަ ހާސިލުކުރީ ފޮރެންސިކް އެނަލިސްޓް އަސިޔަތު މަންހަތު މުޙައްމަދެވެ.
މި ދެ ކޯހުގެ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވީ އެސިސްޓެންޓް ކޮމިޝަނަރ އޮފް ޕޮލިސް އާސިމް ޢަބްދުﷲއެވެ. މި ރަސްމިއްޔާތުގައި ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުގެ ޓްރެއިނިންގ އެންޑް އެޑިއުކޭޝަން ޑައިރެކްޓަރ، ސުޕްރިންޓެންޑެންޓް އޮފް ޕޮލިސް އަޙްމަދު ސަޢީދު ވެސް ބައިވެރިވެވަޑައިގެންނެވިއެވެ.
ކިޔުންތެރިންގެ ހިޔާލު